Билигин абитуриеннар докумуону туттарыыларын үгэнэ. Ким эрэ үрдүк үөрэххэ туттарсар, ким эрэ орто үөрэххэ барар. Ол эрээри, кинилэр бары биир соруктаахтар – үөрэххэ киирэр. Маныаха мэдиссиинэ ыспыраапката ирдэнэр дуо диэн үгүс киһи ыйытар.
Докумуону туттарыыга мэдиссиинэ ыспыраапката ирдэнэр дуу, суох дуу диэн үгүс абитуриент, төрөппүт мунаарар. Ханна эрэ ирдэнэр дииллэр, ханна эрэ ирдэммэт дииллэр, сорохтор былырыын үөрэххэ киирэн баран биирдэ аҕалбыттара дииллэр. Чахчытын билээри “Саха сирэ” хаһыат, edersaas.ru саайт үлэһиттэрэ СӨ Үөрэҕин уонна наукатын министиэристибэтиттэн туоһуласпыппытыгар: “Абитуриеннар мэдиссиинэ көрүүтүн (медицинский осмотр) поликлиникаларга ааһаллар уонна атын докумуоннарын кытта тэҥҥэ туттараллар. Былырыын РФ Үөрэҕириитин министиэристибэтэ докумуоннарын оригиналын үөрэх бастакы сылыгар аҕалыахтарын сөп диэн бирикээһи таһаарбыта. Быйыл оннук ыйыы суох уонна РФ Үөрэҕириигэ министиэристибэтин 2020 сыл балаҕан ыйын 2 күнүнээҕи “Орто анал үөрэх бырагыраамаларыгар үөрэххэ ылыы бэрээдэгин бигэргэтии туһунан” 457-с нүөмэрдээх бирикээһигэр, мэдиссиинэ ыспыраапкатын бары докумуоннарын кытта тута ыыталлар диэн ыйыллар”, — диэн хоруйдаатылар.
Онон өссө лаппыйан быһаардахха, тустаах бирикээскэ олоҕуран, Саха сирин орто үөрэҕин тэрилтэлэригэр абитуриеннар доруобуйаларын туоһулуур мэдиссиинэ ыспыраапкатын, сайабылыанньаларын электроннай көрүҥүнэн ыытар кэмнэригэр, атын докумуоннарын кытта тэҥҥэ ыытыахтаахтар.
Онтон Саха сирин үөрэнээччилэрэ хото туттарсар, үөрэнэр үрдүк үөрэх кыһатыттан – М.К. Аммосов аатынан Хотугулуу-Илиҥҥи федеральнай университет киин тутар хамыыһыйатыттан ыйыталаспыппытыгар: “Мэдиссиинэлэрин ыспыраапката баар буоллаҕына атын докумуоннарын кытта билигин дистанционно ыытыахтарын сөп. Суох түгэнигэр үөрэххэ киирэн баран аҕалыахтарын сөп”, — диэн быһаардылар.
Людмила ПОПОВА, “Саха сирэ” хаһыат, edersaas.ru
Хаартыска: avtocod.ru