Мэдиссиинэ национальнай киинэ өрөспүүбүлүкэҕэ бастакынан ханнык сэртипикээти ылла?
Өрөспүүбүлүкэтээҕи 1 №-дээх балыыһа-Мэдиссиинэ национальнай киинэ мэдиссиинэ үлэтин хаачыстыбатыгар уонна куттал суох буолуутугар Росздравнадзор сэртипикээтин өрөспүүбүлүкэҕэ бастакынан ылла.
Мэдиссиинэ национальнай киинэ быйыл бэс ыйыгар мэдиссиинэ үлэтин хаачыстыбатын уонна куттал суох буолуутун ирдэбиллэригэр төһө сөп түбэһэрин быһаарар аудиты ситиһиилээхтик ааспыта. Аудиты Росздравнадзор Хаачыстыбаҕа национальнай институтун эспиэрдэрин бөлөҕө ыыппыта (институт генеральнай дириэктэрин солбуйааччы Олег Рудольфович Швабской салайааччылаах). Росздравнадзор эспиэрдэрэ мэдиссиинискэй көмө хаачыстыбатын уонна куттал суох буолуутун ис хонтуруоллааһыны тэрийии бырактыычаскай ыйыыларыгар бу балыыһа сөп түбэһэрин бигэргэппиттэрэ.
Онон, балыыһа от ыйыгар “Мэдиссиинэ үлэтигэр хаачыстыба уонна куттал суох буолуута” сэртипикээти тутта. Сертификация бастакы соруга – мэдиссиинэ үлэтигэр хаачыстыбаны уонна куттал суох буолуутун хааччыйыы.
Мэдиссиинэ национальнай киинин улахан түмсүүлээх хамаандатын өр сыллаах үлэтэ-хамнаһа хаачыстыба сэртипикээтин ыларга тириэртэ.
Мэдиссиинэ национальнай киинэ мэдиссиинэ үлэтигэр хаачыстыба үрдүүрүн уонна куттал суох буолуутун хааччыйар, үлэһиттэр таһымнара үрдүүрүн көҕүлүүр, эмтэнээччилэри көрүү хаачыстыбатын тупсарар.
Надежда ЕГОРОВА, «Саха сирэ», еdersaas.ru
Мэдиссиинэ национальнай киинин пресс-сулууспатын хаартыскалара