Доруобуйа харыстабылын ытыктабыллаах бэтэрээннэрэ уонна үлэһиттэрэ!
Мэдиссиинэ үлэһитин күнүнэн Саха Өрөспүүбүлүкэтин салалтатын уонна тус бэйэм ааппыттан истиҥник эҕэрдэлиибин!
Сыралаах үлэҕит уонна дьон туһугар бэйэни харыстаммакка сыралаһаргыт, истиҥ уонна амарах сүрэххит, дириҥ өйгүт, аламаҕай сыһыаҥҥыт иһин махтал тыллары аныыбын! Иккис сылын эһиги коронавирус сыстыганнаах дьаҥын утары дьоһуннук охсуһаҕыт. Күн ахсын дьон олоҕун быһыыгыт, эмтэнээччилэр этэҥҥэ буолалларыгар бары кыһамньыгытын уураҕыт.
Бүгүн уопсастыба доруобуйаҕа улахан суолтаны уурар. Ол иһин, Саха Өрөспүүбүлүкэтигэр 2021- 2030 сылларга чэбдигирии уон сылынан биллэриллибитэ.
Биһиги доруобуйа харыстабылын бастакы сүһүөх звенотун, чэбдигирдэр үлэни бөҕөргөтүүнү салгыыбыт. Ордук улахан болҕомто мэдиссиинэ өҥөтүн хаачыстыбатын үрдэтиигэ уонна эрэллээх, көдьүүстээх, барыларыгар кыаллымтыа буоларын ситиһиигэ, исписэлиистэри үөрэтиигэ тиһиги сайыннарыга, үрдүк бэлэмнээх каадырдары тардыыга ууруллуо.
Өссө биир сүрүн биричиинэнэн – наукаҕа чинчийиини сайыннарыы, мэдиссиинэ саҥа ньыматын олоххо тэтимнээхтик киллэрии, биир тиһик иһитиннэрэр эйгэни тэрийии буолар.
Бу сылга өрөспүүбүлүкэҕэ номнуо 23 биэссэр-акушер пууна, үс амбулатория үлэҕэ киирдэ, доруобуйа харыстабылын эбийиэктэригэр хапытаалынай өрөмүөннэр ыытыллаллар. Биэс сыл устатыгар 12 оройуон киин балыыһатын тутуу, биэссэр-акушер пууннарын саҥалыы уларытан оҥоруу, “Доруобуйа харыстабылын бастакы сүһүөх зенотун саҥатытыы” федеральнай бырагырааманан оройуоннарга мэдиссиинэ тэриллэрин саҥардан биэрии былааннаналлар. “Доруобуйа харыстабыла” национальнай бырайыак иитинэн Дьокуускайга саамай аныгы технологиянан хааччыллыахтаах искэн ыарыылаахтары эмтиир диспансеры, ону сэргэ сүрэх-тымыр ыарыылаахтары эмтиир киини тутуу үлэлэрэ салҕаналлар. Бу үрдүк хаачыстыбалаах көмөнү оҥорорго, дьоҥҥо-сэргэҕэ мэдиссиинэ өҥөтө кыаллымтыа буоларыгар кыаҕы биэриэҕэ.
Эрэнэбин, бары бииргэ кыһамньыбытын ууран көмөлөөтөхпүтүнэ, туруоруммут сыалбытын биһиги ситиһиэхпит!
Бу үөрүүлээх бырааһынньык күнүнэн доруобуйа харыстабылын тиһигин сайыннарыыга бары күүстэрин, кыһамньыларын, билиилэрин, үлэҕэ үөрүйэхтэрин уурбут бэтэрээннэргэ улахан махталбын тиэрдэбин. Мэдиссиинэ эйгэтигэр, наукаҕа бары билиҥҥи ситиһиилэр — бу эһиги үлэҕит, дьулуһуугут, дьүккүөргүт түмүктэрэ буолаллар.
Дьолу, кытаанах доруобуйаны, бигэ туругу, сырдык санааны, эрэли уонна саҥа дьоһун ситиһиилэри баҕарабын! Эһиэхэ уонна эһиги чугас дьоҥҥутугар эйэни уонна чэлгийэ, чэчирии сайдыыны!
СӨ Ил Дархана Айсен Николаев