Саха АССР 100 сылыгар “Доруобуйа харыстабыла” национальнай бырайыак чэрчитинэн, РФ бырабыыталыстыбатын өйөбүлүнэн, өрөспүүбүлүкэҕэ 3 мобильнай мэдиссиинэ комплекса кэллэ. Бу комплекстары ыраах, үчүгэй суола-ииһэ суох нэһилиэктэрдээх Ленскэй, Уус-Маайа уонна Дьааҥы улуустарыгар биэрдилэр.
Мэдиссиинэ комплекстара “КАМАЗ” массыынаҕа таҥыллыбыттар. Ханна баҕарар тиийэллэр. Атыннык эттэххэ, көлүөһэлээх бэйэтэ поликлиника курдук. Диагнозтыыр, ыарыыны быһаарар тэрил барыта баар: тонометр, электрокардиограф, гемоглобины, глюкозаны, холестерины, иик анаалыһын быһаарар анализатордар, спирометр, пульсоксиметр, стетоскоп, кольпоскоп, ыйааһын, эмтэри харайар халадыынньык, ыскаап, суһал көмөнү оҥорор анал тэриллэр, о.д.а. Ону тэҥэ, докумуону электроннай көрүҥүнэн толорорго анаан аныгы көмпүүтэрдээх остуоллаах.
Бу маннык “көлүөһэлээх поликлиникаҕа” олорсон, миэдиктэр ыраах сытар, суола-ииһэ суох кыра нэһилиэктэргэ баран, диспансеризацияны ыытар, нэһилиэнньэ доруобуйатын көрөр-истэр кыахтаналлар.
Бэрэсидьиэн Владимир Путин көҕүлээбит национальнай бырайыактар 2019 сылтан саҕаламмыттара. Национальнай бырайыактар өлүү ахсаанын аҕыйатарга, мэдиссиинэ тэрилтэлэрин каадырынан хааччыйыыга, диспансеризацияны ыытан, нэһилиэнньэ доруобуйатын туругун тупсарарга туһуланан үлэлииллэр.
2021 сыл бүтүүтэ маннык мобильнай мэдиссиинэ комплекстара Алдан, Үөһээ Бүлүү, Кэбээйи, Мэҥэ Хаҥалас, Нам, Ньурба, Сунтаар, Томпо, Уус Алдан, Хаҥалас, Чурапчы улуустарыгар бэриллибиттэрэ. Барыта 14 комплекс кэлэн, тарҕатыллыбыта.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru