Дьон волонтердар көмөлөрүгэр хайдах курдук наадыйарын бүтэһик сылларга коронавирус тарҕаныыта көрдөрдө. Дойду үрдүнэн ыарыһахтар тустарыгар туруулаһар быраастарга, ону тэҥэ, биэнсийэлээхтэргэ уонна доруобуйаларынан хааччахтаах дьоҥҥо көмөлөһөргө турунналлар. СӨ үөрэҕэ мантан туора турбат.
Бу күннэргэ өрөспүүбүлүкэҕэ эпидемиологическай балаһыанньа сытыырхайбытынан, анал үөрэх тэрилтэлэрин, чуолаан өрөспүүбүлүкэтээҕи мэдиссиинэ кэллиэстэрин (Дьокуускайдааҕы, Нерюнгритааҕы, Алданнааҕы мэдиссиинэ кэллиэстэрэ, Жатайдааҕы тиэхиньикум) устудьуоннара уонна үлэһиттэрэ волонтердар хамсааһыннарыгар кыттыһаллар. Ол курдук, Дьокуускайдааҕы мэдиссиинэ кэллиэһин 300-тэн тахса хорсун устудьуона коронавируһу бохсууга турунна. Медик-волонтердар хайдах үлэлииллэрин Дьокуускайдааҕы мэдиссиинэ кэллиэһин дириэктэрин солбуйааччы Анастасия Дмитриевна Степанова кэпсээтэ:
— Мэдиссиинэ тэрилтэлэрэ бары кэриэтэ — бу поликлиникалар, сытар балыыһалар, улуустааҕы киин балыыһалар волонтер быһыытынан биһиги устудьуоннарбытын ыҥыраллар. Билигин ким ханна үлэлиирин бүтэһиктээх испииһэгин оҥоро сылдьабыт. Устудьуоннар коронавирус тарҕаныытын тохтотууга эрэ кылааттарын киллэрэр буолбатахтар, бэйэлэрин идэлэригэр сатабылларын эмиэ сайыннараллар. Биһиги устудьуоннарбыт колл-кииннэргэ, регистратураларга, дьону көрсөр-киллэрэр (приемный покой), араарар (фильтры) сирдэргэ эмиэ үлэлииллэр. “Лабораторнай диагностика” устудьуоннара лабаратыарыйаларга үлэлииллэр. Сорохтор куттаммакка кыһыл зона быраастарыгар көмөлөһөллөр. Аэропортарга сөмөлүөтүнэн көтөн кэлбит дьону “фильтрдыырга” көмөлөһөөччүлэр эмиэ бааллар. Онон бу үлэҕэ биһиги кэллиэспит үгүс устудьуона сыһыарылынна. Кинилэр быраастары кытта тэҥҥэ сарсыардаттан киэһэ хойукка диэри үлэлииллэр. Ол иһин салайааччылар устудьуоннарбытыгар үлэлэрин төлөбүрүн кыаҕын көрөллөрө буоллар.
СӨ үөрэҕин уонна билимин миниистирин бастакы солбуйааччы Михаил Присяжнай медик-волонтерунан үлэлээһин кэнэҕэһин быраас буолалларыгар саҕалааһын диэн эттэ:
— Өрөспүүбүлүкэтээҕи мэдиссиинэ кэллиэһин устудьуоннара ыйыллыбыт хайысханан волонтерунан үлэлээһиннэрэ мэдиссиинэ үктэлигэр саҕалааһынынан буолуон сөп. Мин санаабар, медик-устудьуоннар быраактыкаҕа холонон көрөллөрө үчүгэй. Үчүгэй быраас буолар туһугар, маҥнай дьоҥҥо көмөлөһөн медик-волонтерунан саҕалыыр наада. Хас биирдии волонтер-устудьуоҥҥа махталбын биллэрэбин, идэлэригэр сөптөөх саҕалааһыны оҥорбуттар.
Волонтер-устудьуоннар үлэлэрин кэмигэр уопуттаах настаабынньыктар хонтуруолларынан дьиҥнээх быраактыкаҕа идэлэригэр сатабылларын бигэргэтэллэрэ улахан суолтаах.
Ону таһынан, СӨ Үөрэҕин уонна билимин министиэристибэтэ дьаҥы утары үлэҕэ көмөнү оҥорор. Ол курдук, бу күннэргэ миниистир Ирина Павловна Любимова бирикээһинэн министиэристибэ иһинэн үлэлиир тэрилтэлэр бары системнай администратордара колл-кииннэргэ сыһыарылыннылар. Өрөспүүбүлүкэ доруобуйатын харыстабылын тэрилтэлэрин ирдэнэр миэбэлинэн, тиэхиньикэнэн уонна массыынанан хааччыйыы быһыытынан көмө оҥоһуллуоҕа.
СӨ Үөрэҕин уонна наукатын министиэристибэтин пресс-сулууспата.