Ил Дархан Айсен Николаев быһа сибээс кэмигэр мэдиссиинэ каадырын боппуруоһун туһунан эмиэ эттэ.
Кини өрөспүүбүлүкэҕэ анал инфекционнай балыыһа, сулууспа суоҕа охсуулааҕын коронавирус дьаҥа көрдөрбүтүн, тустаах боппуруоһу өссө былырыын федеральнай таһымҥа туруорсубуттарын иһитиннэрдэ.
“РФ Доруобуйатын харыстабылын министиэристибэтин кытта, инфекционнай балыыһа бырайыактыыр-симиэтэлиир докумуона Саха сиригэр ураты буоларыгар кэпсэппиппит. Тоҕо диэтэххэ, килиимэппит усулуобуйата да атын, онон атын таһымнаах тутуу буолара ордук. Бу этиибитин өйөөтүлэр. Бырайыак экспэртиисэҕэ сылдьар”, — диэн эттэ.
Саха сиригэр эрэ буолбакка, дойду хотугулуу-илиҥҥи өттүгэр мэдиссиинэни кытта өссө биир быһаччы сибээстээх боппуруоһунан мэдиссиинэ каадырын бэлэмнээһин буоларын бэлиэтээтэ. “Коронавирус да суоҕуна мэдиссиинэ каадыра тиийбэтэ көстөрө. Тыа сиригэр эрэ буолбакка, куораттар үгүс балыыһаларыгар үлэһит 60-тан тахса бырыһыанынан эрэ хааччыллан турар. Онон каадыры үүннэриэхтээхпит. Саха сирин каадырынан хааччыйар ХИФУ мэдиссиинэҕэ института, материальнай-тиэхиньиическэй баазатын сайыннардахпытына, үлэһити дойду хотугулуу-илиҥҥи өттүгэр барытыгар киэҥник бэлэмнииргэ бэлэм. Мэдиссиинэ институтун анал куорпуһун бырайыактыыр-симиэтэлиир докумуона бүтэн эрэр, бырайыак судаарыстыбаннай экспэртиисэҕэ сылдьар. Билигин мэдиссиинэ институтун тутуутун боппуруоһа федеральнай инвестиционнай бырагырааманан үбүлэнэригэр туруорсабыт”, — диэн быһаарда. Тустаах боппуруос Саха сирин мэдиссиинэҕэ тэрилтэлэрин аныгы, ирдэнэр, Саха сирин олохтооҕун доруобуйатын туһугар турунар каадырынан хааччыйыаҕа диэн эттэ.
Людмила ПОПОВА, “Саха сирэ” хаһыат, edersaas.ru