Доруобуйа Үөрэх уонна наука

Мэдиссиинэ институтун преподавателлэрэ колл-киин оператордарыгар сүбэ-ама биэрэллэр

Хотугулуу-Илиҥҥи федеральнай университет Мэдиссиинэҕэ институтун бэрэпиэссэрдэрин-преподавателлэрин биэс бэрэстэбиитэлэ Дьокуускайдааҕы мэдиссиинэ тэрилтэлэрин колл-кииннэрин оператордарын информационнай өртүнэн өйүүллэр. Ирдэнэр түгэнигэр сүбэһиттэр ахсааннарын элбэтиэхпит диэн үөрэх кыһатын салаатыгар иһитиннэрдилэр.

Коронавируһу утары охсуһуу – хас биирдии мэдиссиинэ үлэһитин иэһэ. 2020 сылтан саҕалаан бу ыарыыны утары Мэдиссиинэ институтун бэрэпиэссэрдэрин-преподавателлэрин састаабын 52 бэрэстэбиитэлэ үлэлэстэ. Бу да сырыыга туора турбаппыт: биһиги преподавателлэрбит бэйэлэрин холобурдарынан хас биирдии киһи көмөтө хайдах курдук суолталааҕын көрдөрөллөр. Күүспүтүн холбоотохпутуна коронавируһу кыайар кыахтаахпыт”, — диир ХИФУ Мэдэссиинэҕэ институтун дириэктэрэ Николай Гоголев.

Институт оҕо ыарыыларыгар пропедевтикатын кафедратын дассыана Лена Степанова мэдиссиинэ тэрилтэлэрин колл-киинин оператордарыгар сүбэнэн-аманан көмөлөһүүгэ бастакы уопута. “Мин квалификациябынан информационнай өртүнэн өйөбүлү оҥорор кыахтаах буолан оператордарга көмөлөһөргө санаммытым. Холобур, быраас өссө да тиийэ илик, оттон ханнык эрэ эмтэри анаабыттарын кэнниттэн температурата тахсар киһиэхэ оператор тугу сүбэлиэн билбэт, маннык түгэҥҥэ тугу дьаһанар туһунан быһаарабын. Биһиги көмөбүт эрэйиллэрин тухары сарсыарда 8 чаастан киэһэ 8 чааска диэри үлэлиэхпит”, — диэн Лена Степанова санаатын үллэстэр.

Күн бүгүн коронавирус дьаҥын утары 44 научнай-педагогическай үлэһит уонна 722 үөрэнээччи сыһыарыллыбыта. Кинилэртэн 426 устудьуон, 296 ординатор.

ХИФУ пресс-сулууспата.

0
0
Telegram @edersaas20