Мэдиссиинэ идэлэригэр тус сыаллаах үөрэххэ миэстэни сыллата эбэн иһэллэр

Ааптар: 
Бөлөххө киир:

Ил Дархан Айсен Николаев СӨ Доруобуйа харыстабылын министиэристибэтигэр ордук тыа сиригэр, ону тэҥэ, хотугу улуустары быраастарынан уонна мэдиссиинэ үлэһиттэринэн хааччыйыыны үрдэтэр соругу туруорбута.

Каадыр боппуруоһун хааччыйар инниттэн Доруобуйа харыстабылын министиэристибэтэ тус сыаллаах дуогабардары түһэрсэр. Тус сыаллаах үөрэтии, устудьуон үөрэҕин бүтэрдэҕинэ үлэнэн хааччылларын мэктиэлиир, оҕо өссө үөрэххэ киириэн иннинэ үлэ биэрээччини кытта дуогабардаһар. Үөрэҕин бүтэрдэҕинэ дуогабардаспыт тэрилтэтигэр баран, үс сыл үлэлиир.

Ил Дархан соруга толоруллар, тус сыаллаах үөрэххэ ылыы былырыыҥҥытааҕар эбилиннэ. 2022 сыл атырдьах ыйын 3 күнүнээҕи туругунан, специалитекка 237, ординатураҕа 77, орто анал үөрэххэ 397 тус сыаллаах дуогабары түһэристибит. Итинтэн арктика улуустарын балыыһаларын кытта специалитекка 50, орто анал үөрэххэ 74 дуогабар”, — диэн СӨ Доруобуйатын харыстабылын министиэристибэтигэр иһитиннэрдилэр.

Ити курдук, 711 тус сыаллаах дуогабарга илии баттанна. Ординатураҕа уонна орто анал үөрэххэ дуогабары түһэрсии салҕанар. Былырыын 622 тус сыаллаах дуогабар түһэрсиллибитэ, ити 2019-2020 үөрэх дьылынааҕар 266 дуогабарынан элбэх. Доруобуйа харыстабылын министиэристибэтин кытта илии баттаспыт 242 киһи быйыл үөрэҕин бүтэрдэ (ординатураҕа – 35, специалитекка – 80, орто анал үөрэххэ — 126). Бары үлэҕэ киириигэ барыллаан дуогабардаахтар. 27 киһи арктика улуустарын балыыһаларыгар үлэлии барыаҕа.

Итини таһынан, быйыл “Земскэй дуоктар” уонна “Земскэй биэлсэр” бырагырааманан 120 быраас уонна 27 биэлсэр өрөспүүбүлүкэ сэлиэнньэлэригэр, кыра куораттарыгар үлэлии тиийиэхтэрэ (итинтэн 54 быраас уонна 9 биэлсэр – арктика улуустарыгар). Санатан эттэххэ, “Земскэй дуоктар” уонна “Земскэй биэлсэр” бырайыактар “Доруобуйа харыстабыла” национальнай бырайыак доруобуйа харыстабылын бастакы сүһүөҕүн тупсарыы иитинэн олоххо киирэр.

СӨ Ил Дарханын уонна СӨ Бырабыыталыстыбатын пресс-сулууспата.

+1
0
+1
0
+1
0
+1
0
+1
0
+1
0
+1
0