Мэдиссиинэ национальнай киинэ былааннаах көрүүлэри оҥорор

Бөлөххө киир:

Бүгүн, сэтинньи 23 күнүгэр, Өрөспүүбүлүкэтээҕи 1-кы №-дээх балыыһа генеральнай дириэктэрин солбуйааччы Станислав Жирков быһа эпииргэ нэһилиэнньэ ыйытыыларыгар хоруйдаата.

Станислав Жирков:

— Биһиги кииммит коронавируһу эмтииргэ 188 миэстэни таһаарбыта. Реанимация салаатыгар эбии 90 миэстэ көрүллүбүтэ, оттон сүрэх диспансерыгар сүүрбэ миэстэ баар. Ону тэҥэ былааннаммыт көрүүлэри эмиэ саҕалаабыппыт. Биллэн турар, былааннаммыт көрүүгэ олорор миэстэҕитинэн поликлиникаҕыт суруйан ыытар.

Былырыыҥҥы курдук куор дьаҥа туруо суоҕа диэн эрэллээхпит. Куортан быһыыны элбэх киһи ылбыта.

Коронавирус утары вакцинаҕа хааны тутуу бара турар. Коронавируһунан ыалдьан баран үтүөрбүт дьон хааннарын күн аайы хааны тутуу станциятыгар кэлэн, тустаах докуомуоннары көрдөрөн туттарыахтарын сөп.

Биһиги кииммитигэр телемэдиссиинэ салаата толору суукка үлэлии турар. Манна эрийэн быраастартан сүбэ-ама ылыаххытын, эмп суруттарыаххытын сөп.

Үтүөрэн баран КТ-га хаттаан түһэргэ быраас көҥүлэ наада. Ыалдьыбыт дьон тыҥата 90 %—на бэйэтэ чөлүгэр түһэр. Оттон КТ биэрэр ноҕорууската организмҥа олус улахан. Онон, быраас эрэ этиитинэн КТ-га иккистээн түһүөххэ сөп.

Виктория Бястинова, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0