Медиктэргэ федеральнай бүддьүөттэн эбии төлөбүр төлөнүөҕэ

Дойду бэрэсидьиэнэ муус устар 8 күнүгэр бырабыыталыстыба чилиэннэрин, эрэгийиэннэр салайааччыларын кытары мунньахтаата. Мунньахха коронавируһу утары охсуһууга кэккэ миэрэлэри киллэрэрин туһунан эттэ.

edersaas.ru

Бастатан туран, мэдиссиинэ үлэһиттэригэр эбии төлөбүр оҥоһуллуохтааҕын туһунан эттэ. Федеральнай бүддьүөттэн бу сыалга 10 миллиард солкуобай көрүллэрин туһунан иһитиннэрдэ.

Муус устартан  коронавируһу утары охсуһа сылдьар быраастарга – 80 тыһыынча солкуобай, сиэстэрэлэргэ, биэлсэрдэргэ – 50 тыһыынча солкуобай, санитардарга – 25 тыһыынча солкуобай ый аайы төлөнүөҕэ. Маннык төлөбүрү 3 ый устата ылыахтара.

Ону тэҥэ, “Суһал көмө” быраастарыгар – 50 тыһыынча солкуобай, биэлсэрдэргэ, суоппардарга – 25 тыһыынча солкуобай көрүллүөҕэ.

“Инники күөҥҥэ үлэлиир, дьон олоҕун быыһыыр ытык иэстэрин толоро сылдьар медиктэр үлэлэрэ сыаналаныах тустаах” диэн Владимир Путин эттэ.

Санатар буоллахха, Саха сирэ урутаан маннык миэрэлэри ылыммыта.

“Медиктэр уонна волонтердар – биһиги кэммит дьоруойдара” диэн Ил Дархан Айсен Николаев “Сноб” сурунаалга интервьютугар этэн турар. Өрөспүүбүлүкэ бүддьүөтүттэн коронавируһу утары  үлэлии сылдьар медиктэргэ ый аайы эбии төлөбүрдэр олохтоммуттара: быраастарга – 66 тыһыынча солкуобай, сиэстэрэлэргэ 40 тыһыынча солкуобай, санитардарга – 20 тыһыынча солкуобай.

Ангелина Васильева, “Саха сирэ” хаһыат, edersaas.ru