РФ бэрэсидьиэнэ Владимир Путин ыам ыйын 6 күнүгэр коронавируһу утары охсуһа сылдьар быраастары страховкалыыр туһунан ыйаах таһаарбыта.
Төлөбүрү быраастар, орто, алын медперсонал, “суһал көмө” суоппардара ылар кыахтаахтар. Ол курдук:
— медик коронавируһунан ыарыйдаҕына, төлөбүр суумата – 68,8 тыһыынча солкуобай;
— коронавирустан суорума суолланнаҕына, дьиэ кэргэнигэр 2,7 мөлүйүөн солкуобайы биэрэллэр;
— ыалдьыбытын түмүгэр, доруобуйата эмсэҕэлээн, инбэлиит буоллаҕына, төлөбүр кээмэйэ: 3-с группалаах инбэлииккэ – 688 тыһыынча солкуобай, 2-с группалаахха – 1,3 мөлүйүөн солкуобай, 1-кы группалаахха – 2 мөлүйүөн солкуобай.
— Саха сиригэр биир үлэһит “больничнайынан” страховой төлөбүрүн ылла. Төлөбүрү страховой чинчийии түмүгүнэн, Социальнай страховкалааһын пуондата төлүүр, — диэн доруобуйа харыстабылын миниистирэ Елена Борисова иһитиннэрдэ.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн.