Короновируһу утары охсуһа сылдьар медиктэргэ федеральнай уонна өрөспүүбүлүкэтээҕи бүддьүөттэн эбии төлөбүрдэр көрүллэллэр. Бу күннэргэ медиктэр муус устардааҕы өрөспүүбүлүкэ төлөбүрдэрин туттулар.
— Эбии төлөбүр дьуһуурустубаҕа төһөнү үлэлээбиттэринэн көрөн, ааҕыллар. Кулун тутар, муус устар ыйдарга коронавируһу утары охсуһар 2 тыһыынчаттан тахса медиккэ федеральнай бүддьүөттэн 102 мөлүйүөн солкуобай, өрөспүүбүлүкэ бүддьүөтүттэн 50 мөлүйүөн солкуобай ыытыллыбыта. Онон төлөбүрдэр кэмигэр төлөнөн иһэллэр, — диэн өрөспүүбүлүкэ доруобуйа харыстабылыгар миниистирэ Елена Борисова иһитиннэрбитэ.
Санатар буоллахха, өрөспүүбүлүкэ бүддьүөтүттэн коронавируһу утары үлэлии сылдьар медиктэргэ ый аайы эбии төлөбүрдэр олохтоммуттара (толору дьуһуурустубаны үлэлээтэҕинэ):
Быраастарга – 66 тыһыынча солкуобай, сиэстэрэлэргэ 40 тыһыынча солкуобай, санитардарга, техүлэһиттэргэ – 20 тыһыынча солкуобай.
Оттон федеральнай бүддьүөттэн: быраастарга — 80 тыһыынча солкуобай, сиэстэрэлэргэ, биэлсэрдэргэ — 50 тыһыынча солкуобай уонна санитардарга, техүлэһиттэргэ 25 тыһыынча солкуобай төлөнөр.
Мөлүйүөнүнэн дьону сутуйбут, сүүһүнэн тыһыынча киһи тыынын толук ылбыт кутталлаах инфекцияны утары, дьиэни-уоту, оҕону-урууну да умнан, бэриниилээхтик үлэлии-хамсыы сылдьар, дьон олоҕун быыһыыр үрүҥ халааттаах аанньалларбытыгар махталбыт улахан.
Ангелина Васильева, «Саха сирэ» хаһыат, edersaas.ru
Хаартыска: интэриниэттэн