Коронавируснай инфекцияны кытары охсуһа сылдьар медиктэргэ төлөбүрдэри биэриини бу сыл бүтүөр диэри уһатар туһунан РФ бырабыыталыстыбата этии киллэрдэ. Ол туһунан премьер-миниистир Михаил Мишустин иһитиннэрдэ.
— Пандемия балаһыанньатын кэтээн көрөбүт. Биллэн турар, бастаан саҕаланарын курдук буолбатах. Ол эрээри, балаһыанньаны ырытан көрөн баран, этиилэрбитин бэрэсидьиэн Владимир Путиҥҥа киллэриэхпит, — диэн кини эттэ.
Санатар буоллахха, өрөспүүбүлүкэ бүддьүөтүттэн коронавируһу утары үлэлии сылдьар медиктэргэ ый аайы эбии төлөбүрдэр олохтоммуттара (толору дьуһуурустубаны үлэлээтэҕинэ): быраастарга – 66 тыһыынча солкуобай, сиэстэрэлэргэ 40 тыһыынча солкуобай, санитардарга, техүлэһиттэргэ – 20 тыһыынча солкуобай. Оттон федеральнай бүддьүөттэн: быраастарга — 80 тыһыынча солкуобай, сиэстэрэлэргэ, биэлсэрдэргэ — 50 тыһыынча солкуобай уонна санитардарга, техүлэһиттэргэ 25 тыһыынча солкуобай төлөнөр.
Ангелина Васильева, «Саха сирэ» хаһыат, edersaas.ru
Хаартыска: интэриниэттэн.