Роспотребнадзор иһитиннэрэринэн бэҕэһээ Саха сиригэр 1211 киһи эбии коронавирустаабыт. Бачча элбэх киһи өссө ыалдьа илигэ.
Бүтэһик сууккаҕа балыыһаҕа 107 киһи киирбит. Бырабыыталыстыба бэрэссэдээтэлин солбуйааччы Ольга Балабкина бүгүҥҥү брифинг кэмигэр балаһыанньа Дьокуускай куоракка, Хаҥалас, Нам, Мэҥэ Хаҥалас улуустарыгар уустук диэн эттэ. Дьокуускайга суукка устата стационарга 77 киһи, улуустарга 30 киһи киирбит, 69 ыарыһах ыарахан туруктааҕын иһитиннэрдэ.
Мэдиссиинэ ситимнэригэр, ордук Дьокуускай куорат мэдиссиинэтин бастакы сүһүөҕэр улахан ноҕурууска сүктэрилиннэ, көрүллэр нормативтан уонунан төгүл улахан ноҕурууска диэн бэрэссэдээтэли солбуйааччы эттэ. Күн бүгүн дьон мэдиссиинэ тэрилтэлэригэр төлөпүөннүүллэр, боппуруостар төһө кыалларынан суһаллык быһаарыллаллар. “Бүгүҥҥүтэ өрөспүүбүлүкэ доруобуйатын харыстабыла мэдиссиинэ көмөтүн оҥорор, билигин идэтинэн үлэлээбэт үрдүк уонна орто медицинскэй үөрэхтээх дьоҥҥо наадыйар. Онон сибээстээн баҕа өттүнэн мобилизацияҕа ыҥырабыт. Ону тэҥэ, СӨ норуотун дьокутааттарын Владимир Чичигинаровы, Любовь Явловскаяны коронавирус дьаҥын утары бастакы сүһүөх көмөнү оҥорор үлэҕэ көмөлөһөргө ыҥырабыт”, — диэн Ольга Балабкина эттэ. Уонна сарсыҥҥыттан ХИФУ мэдиссиинэҕэ дуоктардара, бэрэпиэссэрдэрэ, ааттаах-суоллаах мэдиссиинэ үлэһиттэрэ бырааһы ыҥырыыны таһынан колл-кииннэргэ нэһилиэнньэҕэ сүбэ-ама биэриэхтэрэ диэн быһаарда.
“Саха сирэ” хаһыат, edersaas.ru
Хаартыска: unsdg.un.org