Бүгүн “Куруһаала” Эргиэн киинигэр “МедЭКСПО. Доруобуйа уонна Кэрэ буолуу” регионнар икки ардыларынааҕы Х анал быыстапка аһылынна.
edersaas.ru
Үгэскэ кубулуйбут быыстапка Уһук Хотугу сир усулуобуйатыгар Арассыыйа уонна омук сирдэрин медицинскэй технологияларын туһанарга көмөлөһөр, СӨ доруобуйатын харыстабылын ситиһиилэрин билиһиннэрэр, куһаҕан дьаллыктартан босхолонор спортивнай-чэбдигирдэр ньымалары көрдөрөр уо.д.а. хайысхаларга аналлаах былаһаакканан буолар.
Ол да иһин, муус устар 3-5 күннэригэр ыытыллар быыстапкаҕа стоматология, доруобуйаны чөлүгэр түһэрэр кииннэр, чааһынай клиникалар, фармацевтика, фитотерапия, оптика, доруобай аһылык, медицинскэй страховка, декоративнай косметика уо.д.а. былаһааккаларыгар олус элбэх киһи тоҕуоруста. СПИД-киин, RW тестирование, хааҥҥа саахар, холестерин таһымын билэр уо.д.а. анаалыстарга эмиэ элбэх киһи сырытта. Наркология өрөспүүбүлүкэтээҕи диспансерын исписэлиистэрэ иһитиннэрбиттэринэн, быыстапкаҕа кэлбит дьон компьютертан тутулуга суох буоларга ханнык ньымалар баалларын ыйыталастылар, арыгыһыт дьон аймахтара психолог сүбэтигэр олус наадыйалларын тоһоҕолоон бэлиэтээтилэр.
Дьон-сэргэ маннык быыстапкалар көдьүүстэрин итэҕэйэн кэлэн көрдөрүнэр, ыйыталаһар буолбуттарын таһырдьа турар сардаҥа диагностикатын массыынатыгар уһун уочарат да туоһулуур.
“Фтизиатрия” НПК учаастактааҕы фтизиатра Людмила Судико:
“Бүгүн сарсыарда 10 чаастан олоробут. Олус элбэх киһи кэлэн интэриэһиргиир боппуруостарын ыйыталаста, туоһуласта. Сүрүннээн Манту быһыылара “положительнай” түмүктээх оҕолор төрөппүттэрэ исписэлиискэ хаһан кэлиэххэ сөбүн фтизиапедиатртан кэлэн ыйыталастылар. Онтон улахан дьон сэллигинэн ыалдьыбыт дьонноох буоллахха, хайдах харыстаныахха сөбүн, олус куттаналларын туһунан эттилэр. Бары кэриэтэ сэллик туһунан үчүгэйдик билэллэр. Ыйыталаспыт дьоммутуттан икки эрэ киһи флюроографияҕа түспэтэҕэ икки сылтан ордубут эбит. Атыттар бары сыл аайы түһэллэрин туһунан эппиттэриттэн үөрдүбүт”.
Манна даҕатан эттэххэ, кулун тутар 24 күнүттэн муус устар 24 күнүгэр диэри сэллиги утары охсуһуу аахсыйата ыытылла турар. “Фтизиатрия” исписэлиистэрэ бүгүн даҕаны олус элбэх туһалаах буклеттары, кинигэлэри илдьэ кэлэн, дьоҥҥо түҥэттилэр.
Надежда ЕГОРОВА, “Саха сирэ”, edersaas.ru
Ааптар түһэриилэрэ