Дьокуускай куоракка “Куруһаала” эргиэн киинигэр “МедЭкспо. Доруобуйа уонна Кэрэ буолуу” эрэгийиэннэр икки ардыларынааҕы ХI быыстапка бэҕэһээҥҥиттэн саҕаланна.
edersaas.ru
Быыстапкаҕа 222 киһи “СПИД Киин” исписэлиистэрэ оҥорор экспресс-тиэстэригэр “ВИЧ-инфекцияҕа, “В” уонна “С” вирустаах гепатикка, сифилискэ бэрэбиэркэлэннэ.
“Маннык бэрэбиэркэ түмүгүнэн “В” вирустаах гепатит – 8, “С” вирустаах гепатит – 6 уонна сифилис 1 киһиэхэ бааллара билиннэ”, — диэн “СПИД Киин” ыарыыны сэрэтэр отделын сэбиэдиссэйэ Евгений Кононов кэпсээтэ.
Анаалыстар санитарнай нуормалары тутуһан, стерильнэй уонна биирдэ эрэ туттуллар үнүстүрүмүөннэринэн, омук экспресстэринэн — 96 % чопчутук быһаарар тиэстэринэн ылыллаллар. Түмүгү 10-15 мүнүүтэ күүтэҕин. Тиэс-анаалыһы ким баҕалаах уонна босхо туттарар.
СӨ Доруобуйаҕа харыстабылын министиэристибэтин чахчытынан, өрөспүүбүлүкэҕэ ВИЧ-инфекциялаах киһи ахсаана икки тыһыынча киһиттэн таҕыста. Кинилэртэн үксүлэрэ киин куоракка уонна бырамыысыланнай улуустарга олороллор. Кэнники сылларга ыарыһахтар ахсааннара оройуоҥҥа элбиирэ бэлиэтэнэр (33 оройуоҥҥа).
Надежда ЕГОРОВА, «Саха сирэ» хаһыат, edersaas.ru