Кулун тутар 3 күнүгэр Майа олохтооҕо, тыыл, үлэ, доруобуйа харыстабылын бэтэрээнэ, сэрии кыттыылааҕын огдообото Евгения Николаевна Суворова 95 сааһын томточчу туолла.
Улуустааҕы социальнай көмүскэллээх буолуу управлениетын начаалынньыга Иван Шестаков, кырдьаҕастар улуустааҕы сэбиэттэрин бэрэссэдээтэлэ Маргарита Максимова ытык кырдьаһы дьиэтигэр тиийэн истиҥник эҕэрдэлээтилэр. Иван Иванович РФ Президенэ Владимир Путин уонна СӨ Ил Дархана Егор Борисов эҕэрдэ суруктарын үөрүүлээх быһыыга-майгыга туттартаата.
ССРС доруобуйа харыстабылыгар туйгуна, Мэҥэ Хаҥалас оройуонун бочуоттаах гражданина Евгения Суворова 1940 сыллаахха үөрэҕин бүтэрэн Саха сиригэр ананан кэлбитэ. Бастаан утаа Орджоникидзевскай оройуон Холболоох балыыһатыгар биэлсэр-акушерканан үлэлээбитэ.
«Сэрии сыллара олус ыар этилэр. Күнү-түүнү аахсыбакка нэһилиэктэргэ ыарыһахтарга атынан ыҥырыыга сылдьарбыт. Эмчит тиийбэт, эмп-томп кырыымчык кэмигэр үлэлээн-хамсаан, дьоҥҥо-сэргэҕэ төһө кыайарбытынан көмө буоларбыт», ‒ диэн ахтар Евгения Николаевна.
Кэргэнэ Негнюров Николай Семенович сэрииттэн кэлбитин кэннэ, II Наахара нэһилиэгэр көһөн кэлбиттэрэ. Онтон ыла Мэҥэ сиригэр доруобуйа харыстабылын сайдыытыгар 40-тан тахса сыл эҥкилэ суох үлэлээтэ. Сэттэ оҕону төрөтөн, иитэн-үөрэтэн сүһүөҕэр туруорбута, «Материнскай слава» уордьанынан, «Материнство» мэтээлинэн бэлиэтэммитэ. 16 сиэннэнэн, 28 хос сиэннэнэн, 2 хос-хос сиэннэнэн билигин чугас дьонун ортотугар сэргэхтик олорор.
«Мин бэйэм туспар буолбакка, аттыбар баар дьоммор чэпчэки, үчүгэй буоларын туһугар олорон, үлэлээн кэллим. Үлэни, чиэһинэй буолууну, үтүө быһыыны өрө тутабын. Оҕолорум, сиэннэрим үтүө дьон буолалларыгар, ыччаттарын дьоһуннук иитэллэригэр баҕарабын», ‒ диир 95 саастаах ытык кырдьаҕас.
Марфа Птицына.