Маны аах Уопсастыба

Мэҥэлэр мусуой күнүн бэлиэтээтилэр

Бүгүн аан дойду үрдүнэн мусуой күнэ бэлиэтэнэр. Мэҥэ Хаҥалас улууһун Р.Г.Васильев аатынан улуустааҕы кыраайы үөрэтэр мусуой онлайн киэбинэн сарсыардаттан кэккэ тэрээһиннэри ыытта.

Тэрээһиннэр «Илин Аартык» Мэҥэ Хаҥалас улууһун култууратын Ютуб-ханаалыгар уонна  улуустааҕы кыраайы үөрэтэр мусуой Инстаграмыгар ыытылынна. Мусуой научнай үлэһитэ Александр Эверстов “Ойуун таҥаһа” диэн лиэксийэтин “Илин Аартык” диэн Мэҥэ хаҥаластааҕы Ютуб-ханаалыгар көрдүбүт.
Салгыы “Сир түннүктэрэ” биэриигэ улуус кыраайы үөрэтээччилэрэ биир-биир ыалдьыттаатылар. РСФСР үөрэҕириитин туйгуна, СӨ үтүөлээх учуутала, учууталлар учууталлара Мэҥэ Хаҥалас улууһун уонна Моорук нэһилиэгин бочуоттаах Аполлон Михайлович Апросимов кэпсээнин иһиттибит.

Аполлон Михайлович Моорук литературнай мусуойун төрүттээччи, кыраайы үөрэтээччи бэйэтин олоҕун, чинчийэр үлэтин туһунан кэпсээтэ. Салгыы Дьаҥхаады нэһилиэгин историятын үөрэтэр мусуой бэтэрээн үлэһитэ Нина Федоровна Колосова. I Тыыллыма нэһилиэк историятын үөрэтэр Раиса Захаровна Егорова ыалдьыттаатылар.

Ону тэҥэ Илин Аартыкка мусуой үлэһиттэрэ иллэҥ кэмнэригэр дьүһүйбүт «Морозко» киинэлэрин сүрэхтээтилэр.

Надежда Ильина, edersaas.ru

0
0