Мэҥэлэр илиинэн охсорго ыҥыраллар

Ааптар: 
Бөлөххө киир:

Бу күннэргэ Мэҥэ Хаҥалас улууһун тыа хаһаайыстыбатын управлениетын үлэһиттэрэ бачыым көтөҕөннөр, Тараҕай нэһилиэгин Эбэтигэр илиинэн от охсуу тэрээһинин тэрийдилэр.

edersaas.ru

Тараҕай нэһилиэгин Эбэтигэр ТХУ начаалынньыга Иннокентий Семенов, начаалынньыгы солбуйааччы Дмитрий Петров, племзоотехник Николай Степанов, управление исписэлиистэрэ Дмитрий Игнатьев, Харитон Попов, Василий Окороков, суоппар Анатолий Васильев уонна нэһилиэк олохтоохторо Георгий, Григорий Романовтар элитиэпкэ хотуурдарын илиилэригэр ылан, сарсыардаттан киэһээҥҥэ диэри иккитэ омурҕаннаан от охсон кууһурҕаттылар. Эбэ халдьаайытын аннынан сир талан, 5 гектар кэриҥэ сири охсон нэлэһиттилэр. Учаастак К.К.Байкалов аатынан муниципальнай тэрилтэ бас билиитэ, Георгий Романов түүлэһэн оттуур сирэ. Илиинэн от охсуутун бачыымын көтөҕөөччүлэри сир хаһаайына хотуурдарынан, итии чэйинэн хааччыйда.

Тиэхиньикэ, тыраахтар сатаан киирбэт уонна кытыы, болҕомтоҕо ылыллыбакка хаалан хаалар сирдэри, уулар, суоллар кытыыларын, өтөхтөрү төһө кыалларынан оттуоҕуҥ. Өбүгэлэрбит туттан кэлбит үлэ үстүрүмүөннэрин – элитиэпкэ хотууру хото туһаныаҕыҥ, – диэн Иннокентий Семенов отчуттары ыҥырар.

Улууска оттооһун үгэнэ. От ыйын 27 күнүнээҕи туругунан, ходуһаҕа 1650-тан тахса тиэхиньикэ үлэлиир, 3000-тан тахса отчут оттуу сылдьар. 18 311 гектар ходуһа охсуллубут, 11 442 туонна от кэбиһиллибит.

Гидрологтар бу күннэргэ Өлүөнэ Эбэбит уутун таһыма үрдүүрүн туһунан сэрэтэллэр. От ыйын 31 күнүттэн атырдьах ыйын 2 күнүгэр диэри өрүс уутун таһыма муҥутуур үрдүүрэ күүтүллэр. Онон, өрүс эҥэр сылдьар отчуттар намыһах сирдэргэ, арыыларга оттообут отторун дьаһайаллара, халаантан сэрэхтээх буолаллара ирдэнэр.

Кураан уоттаах тыына биллиитэ күүһүрэн иһэрэ үгүс хаһаайыстыбаны илин эҥээргэ дьиксиннэрэр. Эһиилги от хайдах буолуой диэн ыйытык сытыырхайа быһыытыйда. Мэҥэ Хаҥалас улууһугар үрдүк сирдэр үүнүүлэрэ курааннаан, онуоха аһыҥа аргыс буолан, быйыл сорох ходуһалар быйаҥнара быһаҕас, сорох сиргэ быстар мөлтөх да буолла. Түҥ былыргыттан өбүгэлэрбит үрүҥ тыыннарын өллөйдөөн кэлбит токур хотуурдарын солбуйан саха күөх быйаҥы сомсорго сүрүн үстүрүмүөнэ буолбут элитиэпкэ (литовка) хотууру умна да быһыытыйдыбыт. Тиэхиньикэ сайдан, тэнийэн, билигин илиитинэн от охсо үөрүйэх киһи илин эҥээргэ, киин улуустарга аҕыйаата. Арай, тиэхиньикэ кыайан сылдьыбат ходуһалаахтар эрэ илии хотуурун килбэҥнэтэ дайыталлар. Тиэхиньикэҕэ сигэнии баран, хотуурунан оттонуохха айылаах сир хаалан хаалар. Кураан кэмигэр абыраллаах илии хотуурун эмиэ илиигэ ылар уолдьаста.

«Саха сирэ» хаһыат, edersaas.ru саайтка анаан Майаттан Аркадий Иннокентьев 

+1
0
+1
0
+1
0
+1
0
+1
0
+1
0
+1
0