Аллараа Бэстээххэ, «Олоҥхо дьиэтигэр» оһуохайга сэминээр буолла, маастар-кылаас ыытылынна.
Оһуохайы сэҥээрээччилэр бу дьоро күн улуус нэһилиэктэриттэн үөрүүнэн муһуннулар. Түһүлгэҕэ мустубут бар дьону «Олоҥхо дьиэтин» дириэктэрэ Евдокия Иванова истиҥник эҕэрдэлээтэ: «Үгэс курдук улууспутугар сылын ахсын ыытыллар Култуура уонна спорт эстэпиэтэтигэр оһуохайга үөрэтиини, сэминээри тэрийэн ыытыыны 2012 сылтан киллэрбиппит. Маннык хайысханан үлэлээбиппит үчүгэй түмүктэри көрдөрдө. Ол курдук оһуохайы сэҥээрээччилэр уонна таһаарааччылар ахсааннара эбиллэн иһэр. Быйылгы тэрээһиммит түһүлгэтигэр Мэҥэлии уонна Чыамайыкылыы оһуохайы иһиттибит. Манна 18-35-гэр, 36-50-гар уонна онтон үөһээ саастаахтар кытыннылар«, — диэтэ.
Сэминээри М.Жирков аатынан муусука кэллиэһин фольклорга преподавателэ, импровизатор хомусчут Варвара Степанова , «Олоҥхо дьиэтин» фольклорга исписэлииһэ Аксиния Степанова тэрийэн ыыттылар, дьоҥҥо-сэргэҕэ үчүгэй быһаарыылары биэрдилэр, ыйытыыларга хоруйдаатылар. Онон мустубут дьон бука бары биэс бөлөҕүнэн хайдыһан оһуохай хаамыытыттан саҕалаан, этэргэ тиийэ уһуйулуннулар.
Раиса Брызгалова: — Чыамайыкы оһуохайыгар дьону үөрэтээрибит нэһилиэкпититтэн анаан тэринэн, оҥостон, түөрт чаас устата массыынанан айаннаан кэллибит. 1960-1980 сылларга, ханна да оһуохай умнулла сылдьыбыт кэмнэригэр, биһиги Чыамайыкыбыт оһуохайын өрө туппуппут. Бу оһуохай тугунан уратылааҕый диир буоллахха, биир тылы хат хатылаан этэҕин. Итини сэргэ, хас да киһи үөрэ-дьүөрэ этэллэрэ буолар.
Биһиги оҕо сылдьан, ийэбит Евдокия Павловна Куприянова этэрин ыраахтан истэммит: «Куолаһа эмиэ чугдааран эрэр», — диэн соччолообот буоларбыт. Ийэбит барахсан оһуохайдыырын туох да наһаа сөбүлүүрэ. Билигин, сааһыран баран, аны бэйэбит тэрийэр, оһуохайдыыр буоллубут. Эдэр ыччаты, аймахтарбытын, дьону-сэргэни ыҥырабыт, уһуйабыт, — диэн санаатын үллэһинэ.
Егор Куприянов: «78 саастаах кырдьаҕаспын. Бу сэҥээрэр, сэргиир буоламмын көрө-истэ, кыттыһа кэллим. Биһиги оҕо сырыттахпытына, үс күнү быһа оһуохайдыыр буолаллара. Олус да үчүгэй этэ! Быыстала суох атынтан атын киһи киирэн иһэрэ. Оччолорго Чыамайыкыга оһуохайдыы диэн Амма Лээгититтэн, Амма Наахаратыттан, Дьөппөнтөн тиийэ кэлэллэрин өйдүүбүн. Киһи туох да хара баһаам буолара«, — диэн уруккуну аҕынна.
Бу курдук Аллараа Бэстээххэ Мэҥэлии уонна Чыамайыкылыы оһуохай дьиэрэйдэ. Түһүлгэҕэ мустубут дьон бары да олус астынныбыт, дуоһуйа оһуохайдаан сэргэхсийдибит. Эдэрдэр саҥаны-сонуну билэн, сэргээн, кэрэхсээн, онуоха эбии үөрэнэн, үөрүүлэрэ үксээтэ. Онон быйылгы 63-с төгүлүн ыытыллар Култуура уонна спорт эстэпиэтэтигэр оһуохай таһаарыытыгар күүстээх күрэс күүтэр диэн сэҥээрээччи, кэтэһээччи үксээтэ.
Августина ХАБАРОВА, Майа.
«Саха сирэ» хаһыат, edersaas.ru саайтыгар анаан.