Соторутааҕыта: «Пассажирскай богуон үлэһитигэр бэлэмниир кууруска ыҥырабыт. Кыыс да, уол да буолуон сөп. Бүтэрбиттэр «Саха сирин тимир суоллара» тэрилтэҕэ үлэҕэ киирэллэр», — диэн биллэрии батсаабы толорбута.
edersaas.ru
Бастакы пуойас бочуоттаах пассажирдарын богуоннарыгар үлэлиир дьахталлартан аҥаардара саха кыргыттара этилэрэ. Суруналыыстары Мэҥэ Хаҥалас Майатыттан сылдьар Ариадна Куличкина арыаллаан илдьэ сылдьыбыта.
Холку, кэрэ бэйэлээх саха кыыһа суруналыыстарга барыбытыгар тута сөбүлэппитэ. Ол да иһин буолуо, кини болҕомто киинэ буолан, нууччалыы-сахалыы үлэтин туһунан ирэ-хоро кэпсээбитэ.
— Мин тимир суолга үлэлиэм диэн толкуй да суоҕа. Идэбин эмискэ баҕайы талбытым. Анал куурус аһыллыбытын истэн, Аллараа Бэстээхтээҕи тимир суол үлэһиттэрин бэлэмниир техникумҥа үөрэнэ киирбитим. Быраактыкабын Томмокко ааспытым. Онно идэтийэ түһэн баран, эксээмэн туттарбытым. Үлэлээбитим алтыс ыйа. Бастаан утаа ыарахан курдуга да, кэлин үөрэнним. Оһох оттор, богуон анныттан мууһу көйөр, чох таһар үлэлээх буолан, ордук кыһын ыарахан. Буойас, айаннаан иһэн, көлүөһэтэ мууһуран хаалар. Ону ыстаансыйа аайы хас биирдии проводник бэйэтин богуонун аннын мууһун көйөр, хаарын ыраастыыр. Оһоҕу чоҕунан оттобут. Ону оттон баран, аны түүннэри-күнүстэри, умуллан хаалбат гына, оһоххун көрөҕүн, кэтиигин. Умулунна да, богуонуҥ барыта тымныйар. Икки богуоҥҥа биир проводник симиэнэнэн 12-лии чаас үлэлиибит. Бастаан дьиэбиттэн тэйэн, олох итинник үлэни билбэт киһиэхэ ыарахан этэ. Оҕолорбун да ахтарым. Билигин үөрэнним. 15 күн үлэлиибин, 15 күн сынньанабын. Улам үлэбин сөбүлээн эрэбин. Ол аата идэтийэн эрдэҕим. Онон: «Анал куурустарга үөрэнэн, биһиэхэ кэлэн үлэлээҥ», — диэн ыччаттары ыҥырыам этэ. Аллараа Бэстээххэ тиийэ тимир суол тутулунна. Олус наадалаах үлэ эбит. Богуон проводнига тиийбэт. Онон манна үлэни холкутук булуохха сөп. Ордук сааскы уонна сайыҥҥы өттүгэр үлэлииргэ үчүгэй. Богуоннар бары саҥалар, ыраастар. Киһи үөрэ-көтө үлэлиир. Үлэлиир кэммитигэр куруук пуормабытын кэтэн сылдьабыт. Тэрилтэбит сылга иккитэ босхо тимир суол үлэһитин сайыҥҥы уонна кыһыҥҥы анал таҥаһынан хааччыйар. «Параднай» дэнэр мааны пуормалаахпыт. Таҥаспыт стюардессалар көстүүмнэрин курдук тупсаҕай, аныгылыы сахалыы тигиилээх, — диэн санаатын үллэстэр Ариадна Куличкина.
Ити курдук, төрөөбүт Мэҥэтин Аллараа Бэстээх ыстаансыйатыгар үлэлии киирэн, Ариадна Куличкина өрөспүүбүлүкэтин социальнай-экэнэмиичэскэй сайдыытыгар дьоһуннаах кылаатын киллэрсэр.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.