Мэҥэ хоннохтоох от охсооччута Вячеслав Окороков Бүтүн Арассыыйатааҕы күрэхтэһиигэ кими да иннигэр түһэрбэтэ

Курскайга ыытыллыбыт тыа сирин XII Бүтүн Арассыыйатааҕы оонньууларыгар уон икки киһилээх Саха сирин хамаандата уон биэс көрүҥҥэ дьоһуннук кытынна. 

Курскай тоҕойдооҕу кыргыһыыга сэбиэскэй норуот кыайыытын 75 сылыгар анаммыт тэрээһиҥҥэ спортивнай дьиэ кэргэннэр куоталаһыыларыгар Чурапчыттан Надежда, Василий Лукиннар бастакы миэстэни ыллылар. Уус Алдантан Евгения Гоголева, Екатерина Белолюбская ыанньыксыттар, Мэҥэ Хаҥалас Доллу нэһилиэгиттэн “Доллу” ТХПК уопуттаах тырахтарыыстара Гаврил Десяткин, Михаил Птицын механизатордар куоталаһыыларыгар кыттан, идэлэрин толору баһылаабыттарын итэҕэттилэр.

Оттон биир суотай сири илии хотуурунан охсууга сүүс уолан күрэс былдьаспытыттан, Мэҥэттэн Вячеслав Окороков быйыл даҕаны тэҥнээҕин булбата. Кини көрдөрүүтэ — 3 мүнүүтэ 36 сөкүүндэ.

Роман ПОПОВ,  «Саха сирэ» хаһыат, edersaas.ru