Мэҥэ хаҥаластар Ньургун Скрябиҥҥа икки хостоох кыбартыыра сэртипикээтин туттардылар
Мэҥэ хаҥаластар биир дойдулаахтарын, спортсмен Ньургун Скрябины дойдутугар кэлэ сырыттаҕына көрсөн дьоһун бэлэх оҥордулар.
edersaas.ru
Улуус баһылыга Николай Старостин инстаграмҥа страницатыгар: «Мэҥэ Хаҥалас улууһун олохтоохторо, «Мэҥэ-Хаҥалас улууһа» муниципальнай оройуон дьаһалтата, бары нэһилиэктэр баһылыктара уонна урбаанньыттар көҥүл тустууга аан дойдутааҕы кылаастаах успуорт маастарын, Европа үрүҥ көмүс призерун, Беларуссия чемпионун, Арассыыйа чемпионатын призерун, Иван Ярыгин уонна Тахти бириистэригэр норуоттар икки ардыларынааҕы түһүлгэлэр кыайыылаахтарын Ньургун Скрябины дойдутугар кэлэ сырыттаҕына көрсөн чиэстээн, Дьокуускай куоракка икки хостоох кыбартыыра сертификатын туттардыбыт.
Биһиги улууспут үгүс талааннаах, өрөспүүбүлүкэ, дойду үрдүнэн киэҥник биллибит спортсменнар биһиктэрэ ыйаммыт сирдэрэ буолар. Олортон биирдэстэрэ Ньургун буоларынан биһиги биир дойдулаахпытынан киэн туттабыт. Саха норуотун биллиилээх бөҕөһө тус олоҕун үтүө холобура, үгүс ситиһиилэрин билиҥҥи көлүөнэ спортсменнарга үйэлээх эркээйи буолан, кэскиллээх суолга ыҥыра-угуйа туруоҕа. Уҕараабат эрчимҥин, кэскиллээх санааҕын, мындыр өйгүн биһиги сөҕө-махтайа сыаналыыбыт уонна онон киэн туттабыт!
Кытаанах, бигэ доруобуйаны, ахсаабат күүһү-күдэҕи, хоодуот, булгуруйбат санааны, дьиэ-кэргэҥҥэр уонна олоххор дьолу-соргуну, успуорт түһүлгэлэригэр кыайыы көтөллөнөн норуоккун үөрдэ тураргар баҕарабын!», — диэн суруйда.
edersaas.ru