Мэҥэ Хаҥалас улууһуттан тыа хаһаайыстыбатын үлэһиттэрэ «Бөртө» сылгы собуотугар көмөлөстүлэр.
Улуустан тэриллибит дэлэгээссийэ баһаартан эмсэҕэлээбит «Бөртө» сылгы собуотугар 175 тыһыынча солк. көмөнү оҥордо. Улуус баһылыгын бастакы солбуйааччы Семен Потапов, «Бөртө» ХЭУо сылгы собуотун дириэктэригэр Александр Павловка кэмбиэри туттарда, улуустааҕы тыа хаһаайыстыбатын үлэһит дьонун-сэргэтин аатыттан баҕа санаатын тиэртэ: —«Бөртө» сылгы собуота Саха сиригэр киэҥник биллэр-көстөр уонна бары аграрийдарга үтүө холобур буолар үлэлээх. Бырааттыы Хаҥалас мэҥэ хаҥаластарга тыа хаһаайыстыбатын үлэтин-хамнаһын сайыннарарга мэлдьи көмөлөһөр, өйүүр. Оттон билигин баһаар буолбутун истээт, биһиги улууспут тыатын хаһаайыстыбатын үлэһиттэрэ көмөлөһөр баҕалаахтарын тута биллэрбиттэрэ. Күүстээх санааланыҥ! Бары күүс түмүллэн, атаххытыгар туруоххут, — диэтэ уонна өрөспүүбүлүкэ аграрийдарын сомоҕолоһорго, тирэх буоларга ыҥырда.
Сылгы собуотун салайааччыта Александр Павлов «Тумул», «Солооһун», «Тамма», «Хорообут», «М.Егоров» уонна «Томтор» тыа хаһаайыстыбатын тэрилтэлэригэр, «Хоту» аһы-үөлү оҥорор тэрилтэҕэ, «Павловскайдааҕы үүт собуотугар» уонна «ЯкутНацПродукт», бааһынай хаһаайыстыба (фермерскэй) баһылыктарыгар Попов Аркадий Николаевичка, Жирков Егор Гаврильевичка, Мэҥэ Хаҥалас улууһун тыа хаһаайыстыбатын управлениетыгар тирэх, өйөбүл буолбуттарыгар махтанна.
Санатан эттэххэ, Хаҥалас улууһугар Улахан-Ааҥҥа «Бөртө» сылгы собуота» ХЭУо гарааһыгар баһаар буолбута, тиэхиньикэлэр уокка былдьаммыттара. Бу туһунан СӨ Тыа хаһаайыстыбатын министиэристибэтин пресс-сулууспата иһитиннэрэр.
+1
+1
+1
+1
+1
+1
+1