Доруобуйа Уопсастыба

Мэҥэ Хаҥаласка ыарахан балаһыанньа үөскээтэ

Ыам ыйын 6 күнүгэр өрөспүүбүлүкэҕэ 103 киһи, ол иһигэр Дьокуускайга – 58 киһи коронавируснай инфекциянан ыалдьыбыта бигэргэннэ.

Ордук ыарахан балаһыанньа Мэҥэ Хаҥалас улууһугар үөскээбитэ бэлиэтэнэр. Суукка иһигэр 13 киһи ыалдьыбыт, бэҕэһээ 24 киһи этэ. Сүрүннээн дьиэ кэргэнинэн сыстыһан ыалдьаллар, ону тэҥэ, оҕолор ыалдьыбакка эрэ, вируһу тарҕаталлар диэн өрөспүүбүлүкэтээҕи суһал ыстаап салайааччытын солбуйааччы Ольга Балабкина иһитиннэрдэ. Улууска төһө да муус устар 13 күнүттэн хааччахтыыр миэрэлэри киллэрдэллэр, ыалдьыы ахсаана намтаабат.

Онон Мэҥэ Хаҥалас балаһыанньатынан суһал ыстаап туспа мунньаҕы тэрийдэ. «Роспотребнадзор» уонна мэдиссиинэ тэрилтэлэрэ дьону эмтииргэ, хантаактары быһаарарга бары күүстэрин ууран үлэлииллэр. Улууска коронавируһу утары быһыыны элбэх ахсаанынан ыытан, маассабайдык ылалларын тэрийэллэр.

Ол курдук, таксилары, уопсастыбаннай миэстэлэри, аһыыр сирдэри, маҕаһыыннары, чайнойдары дезинфекциялааһын салҕанар. Аптекаҕа эмп-томп, харыстанар маллар бааллара хонтуруолланар. Мэҥэ Хаҥалас улууһугар нэһилиэктэр икки ардыларынааҕы сырыы-айан уонна туох баар маассабай тэрээһиннэр (ол иһигэр дьиэ кэргэн иһинээҕи бырааһынньыктар) бобулуннулар.

Ону тэҥэ, Бүлүү улууһугар – 7, Горнайга, Чурапчыга – 4, Аммаҕа, Сунтаарга – 3, Муомаҕа, Намҥа, Алдаҥҥа – 2, Кэбээйигэ, Нерюнгригэ, Өймөкөөҥҥө – 1-дии киһи ыарыйда.

Суукка иһигэр 1781 аныылыс оҥоһулунна. Пандемия саҕаланыаҕыттан 1 мөлүйүөн 62 тыһыынчаттан тахса анаалыс оҥоһуллубут.

Ангелина Васильева, “Саха сирэ” хаһыат, edersaas.ru

Хаартыска: sakha.gov.ru

0
1