Мэҥэ Хаҥалас улууһун олохтоохторун биир санааҕа түмэр «СОМОҔОЛОҺУУ САЛАМАТА» алгыстаах айанын атырдьах ыйын 14 күнүттэн Аллараа—Бэстээхтэн саҕалаабыта.
Салгыы күн аайы иккилии-үстүү нэһилиэктэргэ – Төхтүрүнэн, Томторунан, Тумулунан, Төҥүлүнэн, Таратынан, Балыктааҕынан, Дойдунан, Маттанан, Нуораҕананан, Бэдьимэнэн, Сыымаҕынан, Хорообутунан, Табаҕанан, Бүтэйдээҕинэн, Бөкөнөн, Лоомтуканан, о.д.а. сэлиэнньэлэринэн сылдьан, балаҕан ыйын 5 күнүгэр Хаатылымаҕа тиийэн кэллэ.
Улуус нэһилиэнньэтигэр, тыа сирин олохтоохторугар “СЫРДЫК САНАА ҮТҮӨ ТҮҺҮЛГЭТИГЭР КЫТТЫС, ДОЙДУБУТ САЙДАР СУОЛУН ТУТУС!” диэн дэбииһинэн барар бу кэрэ түгэн маанылаах ыалдьыттарынан ырыа-тойук аргыстаах эстрада артыыстара, сцена маастардара буоллулар.
Ол курдук, Хаатылыматааҕы Култуура киинигэр күнүс 15.00 чаастан дьокутаакка хандьыдааттары, хандьыдаат эрэллээх дьонун кытта көрсүһүү буолла.
Мунньахха олохтоохтор М.С. Афанасьев, В.Н. Дмитриева, В.С.Кононов тыл эттилэр.
Көрсүһүү кэнниттэн саламаны баайыы сиэрэ-туома ыытылынна. Манна Хаатылыма бөһүөлэгин ытык киһитэ, үлэ бэтэрээнэ, Дьоруой-Ийэ, нэһилиэк бочуоттаах гражданина 83 саастаах Варвара Романовна Афанасьева кыттыыны ылла. Онтон сөбүлүүр ырыаһыттарбыт Александр Бурнашев, Сардаана Осипова, Айгылаан, Алмаз Васильев, Айар Старков кыттыылаах бэртээхэй кэнсиэр буолла.
Дьон, “мэҥэ хаҥаластар, биһиги түмсүүлээхпит”, диэн, санаата кэлэн, астынна.
«Сомоҕолоһуу саламатын” түмүктүүр түһүмэҕэ балаҕан ыйын 7 күнүгэр Майаҕа ыытыллыаҕа.
Татьяна МАРКОВА, «Саха сирэ» хаһыат, edersaas.ru