Айылҕа харыстабыла Маны аах

Мэҥэ Хаҥаласка ойуур уотун утары туруулаһыыга тэрээһин үчүгэй

Мэҥэ Хаҥаластар ойуурга суоһуур уоту умулларыыга тэрээһиннээхтик туруулаһаллар. Ол үлэ хайдах ыытылларын уонна дьон-сэргэ хайдах көмөлөһөрүн туһунан Мэҥэ Хаҥаластааҕы Биир кэлим дьуһуурунай-диспетчерскэй сулууспа начаалынньыга Егор Матчитов маннык кэпсээтэ:

— Атырдьах ыйын 7 күнүттэн Чурапчыга регистрацияламмыт 4 АСС нүөмэрдээх баһаар биһиги кыраныыссабытыгар киириэҕиттэн үлэни саҕалаабыппыт. Нэдиэлэттэн ордук кэмҥэ дьону, нэһилиэнньэни бөһүөлэктэртэн, тэрилтэлэртэн түмэн, 180-200 киһини мобилизациялаатыбыт. Ону сэргэ Дьокуускайтан устудьуоннар баҕа өттүлэринэн көмөлөһөллөр. Үлэ үс учаастагынан бара турар: Баатара, Дьабыыл, Алтан. Бөөлүүн уонна бэҕэһээ түспүт ардах баһаары хапта. Булуугунан эргитиллэрэ, минерализованнай балаһаны оҥоруу аҕыйах км хаалбыта. Утары уоттааһына аҕыйах км ситэриллибэккэ хаалбыта.

Улуус иһинээҕи тэрилтэлэртэн 6-7 булууктаах тыраахтар, бульдозер тиэхиньикэтэ, ууну таһар 5 водовоз үлэлээтэ. Биир оптуобус көмөлөһөр дьону таста. Дьокуускайга, атын сирдэргэ да олорооччулар, улуус олохтоохторо аһынан-үөлүнэн, туттар тэрилинэн, уу харчынан да көмөлөстүлэр. Онон нэһилиэнньэ көмөтө сүрдээх үчүгэй.  Бүгүн 81 киһи уоту харабыллыы сылдьар. Ону тэҥэ Хаҥалас улууһуттан 42 А нүөмэрдээх баһаар 3 нэһилиэк кыраныыссатыгар анньан турар:  I Тыыллыма, I  Наахара, Чыамайыкы. Онно чугастааҕы нэһилиэктэр, кыраныыссалаһар нэһилиэктэр үлэни 9 чыыһылаттан саҕалаабыттара. 32 киһи минерализованнай балаһаны оҥорууга, утары уоту ыытыыга көмө-ньыма буолар. Сарсын Чурапчы диэкиттэн босхоломмут дьону онно ыытыахпыт. Бүгүн салалта балаһыанньаны көрө-истэ, үөрэтэ барда.

Бэлэмнээтэ Женни Стрюкова.

0
0