Мэҥэ хаҥаластарга бүгүҥҥү күҥҥэ Аллараа Бэстээххэ 2 №-дээх саҥа оскуоланы, Майа сэлиэнньэтигэр дьахтар төрүүр уонна оҕо эмтэнэр отеделениелардаах балыыһа комплексын тутуу, күөлтэн ырааҕа суох мутукчалаах чагдаҕа баар «Сосновка» санаторийы коронавируһунан ыалдьан үтүөрбүт дьон чөлүгэр түһэллэригэр киин оҥоруутун туһунан сытыы кыһалҕалаах боппуруостар инники күөҥҥэ тураллар.
Бу боппуруостарын Судаарыстыбаннай Дуума дьокутаатыгар Галина Данчиковаҕа билиһиннэрдилэр. Муниципалитет былаастара боппуруоһу быһаарарга соруналлар. Аллараа Бэстээххэ саҥа оскуола бырайыага сакаастаммыт, тутуу атаҕа түһүөхтээх сирэ оҥоһуллубут. 550 оҕо үөрэнэр 1963 сыллааҕы урукку мас тутуу эмэҕирбит, эргэрбит уонна аныгы ирдэбилгэ эппиэттээбэт. Ол гынан баран манна федеральнайтан үп-харчы көрүллэрэ наада.
Нэһилиэнньэни долгутар боппуруостары уопсастыбаннаһы кытары көрсүһүүгэ дьүүллэстилэр. Оройуон дьахталларын сэбиэтин бэрэстэбиитэллэрэ, муниципальнай сулууспа бэтэрээннэрэ дьокутааттан дьон-сэргэ кэтэһиитэ туоларыгар өйөбүл көрдөөтүлэр. Мэҥэ Хаҥаласка оҕо төрөөһүнэ элбэх, былырыын 500 кырачаан күн сирин көрбүтэ, оттон быйыл оскуолаҕа 600 кэриҥэ оҕо бастакы кылааска киирэр.
Судаарыстыбаннай Дуума дьокутаатыгар Галина Данчиковаҕа нэһилиэктэр баһылыктара элбэх ыйытыыны биэрдилэр. Ордук бүддьүөттэр икки ардыларынааҕы сыһыаны, министиэристибэлэри уонна биэдэмистибэлэри кытары сөбүлэһиинэн «Уһук Илин гектар» бырагырааматынан сири биэриини, Үтүө дьыала өрөспүүбүлүкэтээҕи бырагырааманан эбийиэктэри тутууну о.д.а. сэргииллэрин биллэрдилэр.
Саха сириттэн РФ Судаарыстыбаннай Дууматын дьокутаата Галина Данчикова Мэҥэ Хаҥалас улууһун олохтоохторо көхтөөхтүк кыттыбыттарын бэлиэтээтэ. Бары туруоруллубут боппуруостар тыа сирин территориятын кэлимник сайыннарыыга, олох хаачыстыбатын үрдэтиигэ туһуланаллара ыйылынна диэн Мэҥэ Хаҥалас улууһун баһылыга Николай Старостин түмүккэ иһитиннэрдэ.