Нацбырайыактар Үөрэх уонна наука

Мэҥэ Хаҥаласка икки оҕо саада аһылынна

Мэҥэ Хаҥалас улууһун киинигэр Аллараа Бэстээххэ уонна Төҥүлү нэһилиэгэр “Сказка”, “Олимпионик” оҕо саадтара саҥа дьиэҕэ көһөн киирдилэр.  

Бу икки эбийиэк судаарыстыба уонна чааһынайдар бииргэ үлэлээһиннэрин ньыматынан тутулунна. Санатан эттэххэ, Саха сирэ бу ньыманан Уһук Илин эрэгийиэннэртэн бастакынан оҕо саадтарын тутарын саҕалаабыта. Судаарыстыба уонна бизнес сүбэлэрин, кыахтарын холбоон, билигин үгүс улууска социальнай эбийиэктэр тутулуннулар. Оҕо саадтарын тутууга сүрүн инвесторынан “Алмаасэргиэнбаан” буолар.

Аллараа Бэстээххэ уонна Төҥүлүгэ оҕо саадтар үөрүүлээх аһыллыыларыгар Корпоративнай бизнес департаменын салайааччыта Федор Ноговицын кыттыыны ылла. Кини “Алмаасэргиэнбаан” бырабылыанньатын бэрэссэдээтэлин Николай Долгунов аатыттан үлэһиттэри, төрөппүттэри эҕэрдэлээн туран, судаарыстыба уонна чааһынайдар бииргэ үлэлээһиннэрин ньыматынан өрөспүүбүлүкэҕэ үгүс оҕо саада тутуллубутун, онуоха “Алмаасэргиэнбаан” сүрүн инвестор буолбутун бэлиэтээтэ.

– Биһиги бэйэбит социальнай эбэһээтилистибэбитин барытын толорон кэллибит. Өрөспүүбүлүкэ биир тутаах тэрилтэтэ буоларбыт быһыытынан, салгыы да социальнай тутуулары ыытарга бэлэммит, бу хайысханан үлэлэһиэхпит, – диэн этэр кини.

Ыспыраапка быһыытынан эттэххэ, Аллараа Бэстээххэ “Сказка” оҕо саада 240 миэстэлээх, үс этээстээх улахан дьиэҕэ көстө. Оттон Төҥүлүтээҕи “Олимпионик” икки этээстээх дьиэлэннэ. Былаан быһыытынан, манна 140 оҕо сылдьыахтаах.

Аграфена КУЗЬМИНА.

0
0