Быйылгы «Эркээйи» хаһыат бирииһигэр чэпчэки атлетикаҕа 61-с эстэпиэтэ Манчаары аатынан стадиоҥҥа ыытылынна. Онон көрөөччүлэр хатыһыылаах куоталаһыы ымпыгын-чымпыгын тутуһан олорон көрөр кыахтаннылар.
Спортсменнары уонна көрөөччүлэри оройуон баһылыга Николай Старостин, оройуон баһылыгын социальнай боппуруостарга солбуйааччы Иван Птицын, оройуон дьокутааттарын Сэбиэтин бэрэссэдээтэлэ Андрей Находкин, спорт управлениетын начаалынньыга Александр Брызгалов, «Эркээйи» хаһыат эрэдээктэрэ Алена Докторова эҕэрдэлээтилэр.
Николай Прокопьевич нэһилиэктэртэн кытта кэлбит сүүрүктэргэ туһаайан, быйылгы сүүрүү «Эркээйи» хаһыат тэриллибитэ 80 сылыгар сөп түбэспитин, маннык күрэхтэһиилэртэн саҕалаан оройуон быһыйдара өрөспүүбүлүкэтээҕи, Арассыыйатааҕы түһүлгэлэргэ үрдүкү ситиһиилэргэ дабайыылара саҕаланарын бэлиэтээтэ, ситиһиилэри баҕарда.
Бастакы бөлөххө Дьаҥхаады нэһилиэгин быһый атахтаахтара алтыс төгүлүн субуруччу бастаатылар. Майа сэлиэнньэтин 1 №-дээх хамаандатын сүүрүктэрэ иккис, харалар үһүс миэстэ буоллулар. Иккис бөлөххө Доллу нэһилиэгин хамаандата кыайыыны ситистэ. Ходоро, Лоомтука сүүрүктэрэ иккис, үһүс кэллилэр.
Үһүс бөлөххө Догдоҥо нэһилиэгин сүүрүктэрэ ситиһиилээхтик кыттан бастаатылар. Чүүйэлэр иккис миэстэни хааччыннылар.
Үөрэнээччилэргэ В.П.Ларионов, Ф.Г.Охлопков ааттарынан Майа, Майатааҕы лиссиэй, Хара, Чүүйэ, Төхтүр, Төҥүлү оскуолаларын хамаандаларын икки ардыгар тыҥааһыннаах куоталаһыы түмүгэр В.П.Ларионов аатынан Майа оскуолатын хамаандата бастаата. Майатааҕы лиссиэй сүүрүктэрэ иккис, төҥүлүлэр үһүс миэстэ буоллулар.
Кыайыылаах хамаандалар көһөрүллэ сылдьар кубоктарынан, мэтээллэринэн, грамоталарынан, «Эркээйи» хаһыакка сыл иккис аҥаарыгар босхо сурутуунан наҕараадаланнылар.
Марфа ПТИЦЫНА.