Доруобуйа Сүрүн

Мэҥэ Хаҥаласка анал бөлөх тиийдэ

Өрөспүүбүлүкэ суһал ыстаабын салайааччытын солбуйааччы Ольга Балабкина бүгүҥҥү брифинигэр сүрүн болҕомтону өрөспүүбүлүкэ улахан улууһугар – Мэҥэ Хаҥаласка туһаайда.

Бу улууска өрөспүүбүлүкэ Үлэҕэ уонна социальнай сайдыыга, Доруобуйа харыстабылын министиэристибэлэриттэн уонна СӨ Ил Дарханын уонна СӨ Бырабыыталыстыбатын Дьаһалтатыттан анал бөлөх тиийбит. Кинилэр ковид улууска тарҕаныытын бохсууга тэрийэр үлэни күүһүрдүөхтэрэ, сүрүннүөхтэрэ.

Маны сэргэ Ольга Валерьевна этэринэн, дьиэ кэргэнинэн ыалдьыы тахса турар. Амма уонна Бүлүү улуустарыгар балаһыанньа хонтуруолга тутуллар. Кэбээйи улууһуттан ыараханнык ыалдьыбыты Дьокуускайга аҕалан эмтииллэринэн, бастакы сүһүөх эмп тэрилтэтигэр үлэ күүһүрүөхтээҕин бэлиэтээтэ.  Ону тэҥэ тымныйбыт, тумуулаабыт дьон бырааһы дьиэлэригэр ыҥырыахтаахтарын санатта. Ити ковидка сыстыыны түргэнник быһаарарга уонна ыарыыны дириҥэппэккэ эмтииргэ көмөлөһүөҕэ.

2000 доза “Спутник” быһыы кэлбитин улуустарга тарҕатыахтара. Туох-ханнык иннинэ тэйиччи сытар, мөлтөх суоллаах-иистээх нэһилиэнньэлээх пууннарга тиийиитин хааччыйыахтара.

Ковид-19 дьаҥа тарҕамматын туһугар инфекционнай стационары эбии арыйарга күһэллибиттэр. Холобур, Мэҥэ Хаҥаласка Хараны сэргэ кэккэ тэрилтэлэргэ арыйбыттар.

Ыам ыйын 7 күнүнээҕи туругунан, ааспыт сууккаҕа өрөспүүбүлүкэҕэ дьаҥҥа хаптарыы 105 түгэнэ бэлиэтэммит. Итинтэн Дьокуускайга – 60, Мэҥэ Хаҥалас – 29, Амма, Бүлүү улуустарыгар – үстүү, Горнай, Нам, Чурапчы улуустарыгар – 2-лии, Сунтаар, Алдан, Кэбээйи, Хаҥалас улуустарыгар – 1-дии.

Суукка устата тустаах лабораторияларга 1445 чинчийии оҥоһуллубут.

Бэлэмнээтэ Женни Стрюкова

Хаартыска: интэриниэттэн

0
0