Мэҥэ Хаҥаласка 65-с төгүлүн ыытыллар бэстибээл саҕаланар

Ааптар: 
Бөлөххө киир:

Мэҥэ Хаҥаласка “В.К.Степанов аатынан култуура уонна успуорт эстэпиэтэтэ” сарсыҥҥаттан саҕаланар. “Чөл, чэгиэн буолуоҕуҥ, уйгу суолун тутуоҕуҥ!” диэн девизтээх бэстибээл 65-c төгүлүн ыытыллар. 

Сылын ахсын ыытыллар үтүө үгэскэ кубулуйбут култуура уонна успуорт эстэпиэтэтэ быйыл үбүлүөйдээх сыла. Улуус бары нэһилиэктэрэ нэһилиэнньэтиттэн көрөн үс бөлөххө арахсан күрэхтэһэллэр. Урукку өттүгэр нэһилиэк атын нэһилиэккэ тиийэн кэнсиэрдиирэ, остуол оонньууларыгар, успуорт көрүҥнэригэр күрэхтэһии бөҕө буолара, олохтоох дьон оҥоһуктарын быыстапката туруоруллара. Быйыл кэлии-барыы тохтоон, хааччахтаныы кэмигэр кэккэ уларыйыылаах бэстибээл ыытыллара бигэргэммитэ. Туох уларыйыылар киирбиттэрин, бэстибээл хайдах быһыылаахтык ыытыллыаҕын туһунан Мэҥэ Хаҥалас улууһун култуураҕа уонна духуобунай сайдыыга салалтатын начаалынньыгыттан Дмитрий Аргуновтан ыйыттыбыт.

— Быйылгы бэстибээл өрөспүүбүлүкэҕэ – Чэбдигирии, улууска сахалартан бастакы Сэбиэскэй Сойуус Дьоруойа Ф.К.Попов төрөөбүтэ 100 сылынан Дьоруой Боппуок сыллара биллэриллибиттэринэн, сүрүн сыал онно туһаайылынна. Уус-уран самодеятельность көрүҥнэригэр театральнай хайысхаҕа болҕомтону ууруу, уус-уран кэнсиэр биирдиилээн нүөмэрин сайыннарыы уонна эстэпиэтэ иитэр-үөрэтэр суолтатын дириҥник өйдөөн, идеологическай өйү-санааны иҥэрэр, тыыны уһугуннарар, чөл олоҕу түстүүр үтүө үгэс буоларын бар дьоҥҥо тириэрдии. Пандемия ирдэбилин учуоттаан быйылгы бэстибээл дьоҕустук оҥоһулунна. Нэһилиэктэр бэйэ-бэйэлэригэр барыылара тохтотулунна. Дьүүллүүр сүбэ үс бөлөҕүнэн айанныаҕа. Урукку өттүгэр култуура уонна успуорт эстэпиэтэтин көрүҥэ элбэх эбит буоллаҕына, быйыл алта эрэ көрүҥ киирдэ: испэктээк, уус-уран оҥоһуктар быыстапкалара, Ф.К.Поповка аналлаах иһитиннэрэр-биллэрэр истиэндэ, успуорка күрэхтэһиилэр. Ону таһынан оскуола оҕолоро улахан дьон тэрээһиннэриттэн туспа балаһыанньанан уус-уран самодеятельноска, уус-уран быыстапкаҕа, успуорт көрүҥнэригэр кытталлар.
Кулун тутар 10 күнүгэр былырыыҥҥы бэстибээл кыайыылаахтара, бастакы бөлөҕү Төҥүлү, иккис бөлөҕү Бэдьимэ, Үһүс бөлөҕү Моорук нэһилиэктэрэ саҕалыахтара.

Хаартыскалар былырыыҥҥы бэстибээл архыыбыттан ылылыннылар.

+1
0
+1
0
+1
0
+1
0
+1
0
+1
0
+1
0