2007 сыллаахха Мэҥэ Хаҥалас Аллараа Бэстээҕэр кэнчээри ыччат кэскилин санаан, кинилэр куттарын-сүрдэрин бөҕөргөтөр, өйдөрүн-санааларын сааһылыыр үлэ наада диэн санаанан салайтаран, уонча эр киһи «Төлкө» чөл олоҕу пропагандалыыр түмсүү тэриммиттэрэ.
Елена ПОТОЦКАЯ «Саха сирэ» хаһыат, edersaas.ru
Уопсастыбаннай түмсүү хайа күн тэриллиэҕиттэн күн бүгүнүгэр диэри үлэлэһэ сылдьар Анатолий Тастыгин, Иннокентий Трифонов, Олег Захаров, Иннокентий Яковлев, Павел Яковлев, Евгений Шарин уол оҕону төрүт култуураларын сүтэрбэккэ, атын омуктары кытта тэҥҥэ бодоруһан, доҕордоһон уонна кинилэр кыахтаах өрүттэрин мындырдык туһанар ньымаҕа үөрэтэллэр.
Иван Румянцев салайар “Төлкө” түмсүүтэ уон сыл устата “Уол оҕону төрүт үгэһинэн иитии” анал бырайыагынан үлэлээн кэллэ. Бэйэлэрин уопуттарын өрөспүүбүлүкэҕэ тарҕатар сыалтан, «төлкөлөр» бу күннэргэ “Төрүт үгэһи утумнуур “Төлкө” үөрэҕэ” диэн кинигэни бэлэмнээн таһаардылар. Үгүс эр дьон түмсүүлэригэр, аҕалар сэбиэттэригэр өйөбүл буолуон сөптөөх кинигэ “Сайдам” кинигэ кыһатыгар бэчээттэннэ. Кинигэ ааптардара Уйбаан Румянцев, Дорхоон Дохсун, Анна Холмогорова “Төлкө” дьиҥ сахалыы үлэлиир ньыматын арыйан кэпсээбиттэрэ кэрэхсэбиллээх. «Төрүт үгэстэри утумнуур “Төлкө” үөрэҕэ» кинигэ оҕо иитиитигэр үлэлиир дьоҥҥо, төрөппүттэргэ, уһуйааччыларга көмө-тирэх буолар аналлаах.
Ааспыт нэдиэлэҕэ Аллараа Бэстээх 1 №-дээх оскуолатыгар бу кинигэ ис хоһоонун тула истиҥ иһирэх кэпсэтии буолла. Көрсүһүүгэ Дьаҥхаады, Балыктаах, Төҥүлү, Ороссолуода, Майа, Дьокуускай олохтоохторо кыттыыны ыллылар. Кинигэ ааптардарын “Төлкө” уһуйаан иитиллээччилэрэ кэлэн эҕэрдэлээтилэр.
“Төлкө” түмсүү уон сыл үлэлээн кэлбит үлэтин Мэҥэ Хаҥалас улууһун Мунньаҕын бэрэссэдээтэлэ Андрей Находкин, баһылык солбуйааччылара Павел Сазонов, Егор Белолюбскай, оскуола дириэктэрэ Станислав Захаров, саҥа тэриллибит “Ил Сүбэ” эр дьон түмсүүтүттэн Петр Турнин үрдүктүк сыаналаатылар.
Елена ПОТОЦКАЯ «Саха сирэ» хаһыат, edersaas.ru