Өрөспүүбүлүкэ суһал ыстаабын салайааччытын солбуйааччы Ольга Балабкина ыам ыйын 14 күнүнээҕи брифинигэр ковид тарҕаныытын уонна туохха болҕомто уурар наадатын туһунан кэпсээтэ.
Кини былаас болҕомтотун Мэҥэ Хаҥалас улууһа тардарын эттэ. Ол курдук, бу улуус суһал ыстааба үлэтин күүһүрдэрэ ирдэнэрин эттэ. Онон бүгүн Мэҥэ Хаҥалас оройуона өрөспүүбүлүкэ суһал ыстаабын мунньаҕар отчуоттаабыт. Быһата, өрөспүүбүлүкэ социальнай-экэнэмиичэскэй сайдыытыгар тыын суолталаах улууска дьаҥы хаптатыыга үлэ күүһүрүөхтээх диэн буолла.
Салгыы Ольга Валерьевна төһө киһи бастакы быһыыны ылбытыгар тохтоото. 117000 киһи бастакы быһыытын ылбыт. Ааспыт сууккаҕа 3208 чинчийии оҥоһуллубут. Арассыыйа үрдүнэн Саха сирэ быһыыны ылыыга инники күөҥҥэ иһэрин аҕынна. Ол курдук, кэлбит дозалар бэриллибиттэр.
Маны сэргэ госсулууспалаахтар тэйиччиттэн үлэлээһиннэригэр тохтоон, үлэһиттэр 50 бырыһыаннара маннык үлэҕэ көһөрүллүбүтүн эттэ. Үлэ министиэристибэтэ бу ирдэбил туолуутун хонтуруоллуоҕа. 65+, хроническай ыарыылаахтары уона хат дьахталлар тэйиччиттэн үлэлииргэ сүбэлииллэр.
Дьаҥҥа бастаан кырдьаҕастар хаптараллар диир буоллахтарына, аны бу ыарахан ыарыынан оҕолор уонна 30 диэри саастаах эдэр дьон ыалдьаллара бэлиэтэммит. Онон хас биирдиигит эппиэтинэһин күүһүрдүөхтээх диэтэ суһал ыстаап салайааччытын солбуйааччы.
Бүгүҥҥү туругунан, ыалдьыы 106 түгэнэ бэлиэтэммит. Ол курдук, Дьокуускайга – 61, Мэҥэ Хаҥалас оройуонугар – 19, Уус Алдан оройуонугар – 5. Маны сэргэ Амма, Горнай, Чурапчы – 3-түү, Алдан, Бүлүү, Нам, Ньурба – 2-лии, Кэбээйи, Өлөөн, Сунтаар, Хаҥалас – 1-дии. Онон бары харыстанар миэрэлэри тутуһарбытыгар ыҥырда Ольга Балабкина.
Бэлэмнээтэ Женни Стрюкова
Хаартыска: интэриниэттэн