Доруобуйа Уопсастыба

Мэҥэ Хаҥалас оройуонун киин балыыһатын харда суруга

Мэҥэ Хаҥалас улууһугар быһыы кэнниттэн киһи олохтон туораабытын туһунан сурах батсаап ситиминэн күүскэ тарҕанна. Ол тарҕаммыт сурукка Мэҥэ Хаҥалас киин балыыһата маннык ис хоһоонноох хоруй суруйда:

«Мэҥэ Хаҥалас улууһугар оскуола дириэктэрэ ковид-19 утары быһыыны ылан баран ыалдьан, суорума суолланна диэн сымыйа сурах интэриниэт ситиминэн тарҕанна. Сымыйа сураҕы тарҕаппыт киһи билигин маассабайдык ыытылла турар ковид утары вакцинацияны харгыстаары суруйбута саарбаҕа суох. Ити сурахха Мэҥэ Хаҥалас киин балыыһатын салалтата маннык чопчу быһаарыыны биэрэр: кини ЭпивакКорона вакцина 1 компоненын 05.05.2021 с. туох даҕаны ойоҕостон (побочнай) реакцията суох ылбыта, 2-с компоненын 19.05.2021 с. ылыахтаах этэ. Хомойуох иһин, 11.05.2021 с. ыалдьан дьиэтигэр быраас ыҥыран көрдөрбүтүн уонна 12.05.2021 с. ПЦР-анаалыһын түмүгүнэн коронавируһунан ыалдьыбыта, 12.05.2021 с. компьютернай томография түмүгүнэн сэбиргэхтэтэн ыалдьыбыта биллибитэ. Ол күн инфекционнай отделениеҕа эмтэнэ киирбитэ. Ыарыы олус күүскэ киирэн уонна дьарҕа буолбут ыарыылара көбөн, бу дьыл бэс ыйын 2 чыыһылатыгар биһиги кэккэбититтэн олохтон туораабытынан чугас аймахтарыгар, бииргэ үлэлиир кэллиэгэлэригэр дириҥ кутурҕаммытын тиэрдэбит.

Мэҥэ Хаҥаластааҕы киин балыыһа кэлэктиибэ

Надежда Ильина «Саха сирэ» хаһыат, edersaas.ru

Хаартыска интэриниэт ситимиттэн ылылынна

2
5