Мэҥэ Хаҥалас олохтоохторо суол-иис өрөмүөнүн, күөх төлөнү киллэрии туһунан ыйыттылар
Мэҥэ Хаҥалас улууһун олохтоохторун иннигэр СӨ Бырабыыталыстыбатын отчуота ыытылынна. Сыллааҕы үлэ түмүгүн СӨ Бырабыыталыстыбатын Бэрэссэдээтэлин бастакы солбуйааччы Дмитрий Садовиков билиһиннэрдэ.
Вице-премьер национальнай бырайыактар былаан быһыытынан толоруллубуттарын эттэ. Оскуолалар, оҕо уһуйааннара, суол-иис, аэропортар, сибээс опто-волоконнай ситимнэр, о.д.а. ааттаталаата. Социальнай суолталаах 46 улахан эбийиэк үлэҕэ киирбит.
Министиэристибэлэр уонна биэдэмистибэлэр бэрэстэбиитэллэрэ Мэҥэ Хаҥалас оройуонун олохтоохторун ыйытыыларыгар хоруйдаатылар. Ордук элбэх ыйытыы суол тутуутун уонна гаас киллэриитин туһунан буолла. Өлөчөй, Бүтэйдээх, Сыымах, Чыамайыкы, Бэдьимэ туһаайыыларыгар саҥа суолу оҥоруу уонна баар суолу-ииһи өрөмүөннүүргэ ыйытыылар нэһилиэктэр салалталарыттан, нэһилиэнньэттэн киирдилэр. Бары хайысхаларга тус-туспа хоруй бэрилиннэ – ханна эрэ суол оҥоһуута быйылгы былааҥҥа баара, сорох хайысха федеральнай үбүлээһиҥҥэ бырайыак быһыытынан киирбитэ этилиннэ. Маны таһынан тыа хаһаайыстыбатыгар сыһыаннаах ыйытыылар, үүт туттарыытыгар, ыанар ынахха ананар субсидия кээмэйэ, кураан сылга отунан хааччыйыы кыһалҕалара ырытылыннылар.
Тыа сирин дьоно сэһэргэһиигэ көхтөөхтүк кытыннылар, сэҥээрбит ыйытыыларын ымпыгар-чымпыгар тиийэ быһаарыстылар.
«Саха сирэ» хаһыат, edersaas.ru
Хаартыска ЯСИА