Ахсынньы 8 күнүгэр Мэҥэ Хаҥалас улууһун «Эркээйи» хаһыата 80 сыллаах үбүлүөйүн бэлиэтээтэ.
Д.Ф.Ходулов аатынан норуодунай тыйаатырга оройуоҥҥа хаһыат бастакы нүөмэрэ тахсыытыгар анаммыт үөрүүлээх тэрээһиҥҥэ нэһилиэктэртэн хаһыат уопсастыбаннай кэрэспэдьиэннэрэ, араас сылларга үлэлээн ааспыт кырдьаҕастар, нэһилиэк баһылыктара, тэрилтэ салайааччылара ыҥырыллан сырыттылар. Оройуон дьокутааттарын Сэбиэтин бэрэссэдээтэлэ Андрей Находкин оройуоҥҥа хаһыат сайдыытын устуоруйатын билиһиннэрдэ.
Бу күн кэрэспэдьиэннэргэ, хаһыат сайдыытыгар кылааттарын киллэрсибиттэргэ, айар куонкурус кыайыылаахтарыгар үөрүүлээх быһыыга-майгыга бэлиэ наҕараадалар, бириэмийэлэр туттарылыннылар.
СӨ Сибээскэ уонна информационнай технологияларга министиэристибэтиттэн Алевтина Иннокентьева, Айсена Николаева, СӨ Суруналыыстарын сойууһун аатыттан Владислав Касьянов, оройуон баһылыгын бастакы солбуйааччы Павел Сазонов, оройуон дьокутааттарын Сэбиэтин бэрэссэдээтэлэ Андрей Находкин, Нам, Амма, Таатта, Чурапчы, Хаҥалас оройуоннааҕы хаһыаттарын эрэдээксийэлэрин бэрэстэбиитэллэрэ ыалдьыттаатылар.
Үбүлүөйү көрсө хаһыакка 1960 сылтан үлэлиир эппиэттиир сэкирэтээр Виктор Попов «Улууһум хаһыата ‒ олоҕум аргыһа» диэн кинигэтин бэлэмнээн таһаарда.
«Эркээйи» хаһыат 80 сылын бэлиэтиир үөрүүлээх тэрээһиҥҥэ үлэлэспит Павел Сазонов салайааччылаах улуустааҕы хамыыһыйаҕа, күүс-көмө буолбут управлениелар, тэрилтэлэр салайааччыларыгар, предприниматель Руслан Федотовка хаһыатчыттар истиҥ махталларын тиэрдэллэр.
Марфа ПТИЦЫНА, «Саха сирэ» хаһыат, edersaas.ru сайтка анаан.