Томпо улууһун Мэҥэ Алдан олохтооҕо Александра Гуринова оҕо эрдэҕиттэн кэмбиэр ойууларын, мааркалары, араас дойду харчыларын мунньан, билигин наада буоллаҕына, быыстапкаҕа да туруорар кыахтаах.
Командировкаҕа сылдьан ханна да тиийдэрбин, араас дьикти дьарыктаах дьону көрсөн, ону сөҕө-махтайа саныыбын. Бу сырыыга Александра Гуринова кэллиэксийэлэрин көрөн, оскуолаҕа үөрэмит кэммин санаатым. Урут мин эмиэ кэмпиэт суутун, сурук кэмбиэрин ойууларын, араас сүбэлэри, ас-үөл ырысыаптарын хото мунньарым. Александра Иосифовна эмиэ оскуолаҕа үөрэнэ сылдьан бастаан кэмбиэр ойууларын мунньан баран, билигин онтун кэҥэтэн, өссө үлүүһүйэн дьарыктанан, аны значоктары, мыыла, чэй араас көрүҥүн, испиискэ хаатын, магнитиктары, кыптыыйы, сахалыы иһити-хомуоһу, араас дойду харчыларын мунньар.
— 400-ҕэ чугаһыыр испиискэ хаатын мустум. Билигин олох испиискэни оҥорбот буоллулар, онон буларга наһаа ыарахан. Бэйэм иистэнэр буолан, аны былыргы, аныгы кыптыыйдары мунньан эрэбин. Син балачча баар. Сурук кэмбиэрин ойуута хара баһаам. Хас даҕаны альбом буолла. Харчыны эмиэ мунньабын. Саамай былыргы харчы – 1908 сыллааҕы. Эдэр дьоҥҥо туһаайан маннык дьарыгы сэргээҥ, бу биһиги историябытын, култуурабытын кэпсиир туһалаах дьыала диэн этэбин. Киһи дьарыктаах буолуохтаах. Мин быйыл 72 сааспын туоллум. Ол эрээри кырыйдым, сааһырдым диэн быар куустан олорбоппун. Киһи хаһан баҕарар атыттартан үөрэнэргэ, туох эрэ саҥаны билэргэ, ону бэйэтигэр иҥэринэргэ дьулуһар. Араас быыстапкаларга сылдьарбын сөбүлүүбүн. Кэлин иистэнэр буоллум. Орон сабыытын, олбохтору, суумкалары тигэбин, — диир Александра Иосифовна.
Александра Иосифовна өссө улуус хаһыатын уопсастыбаннай кэрэспэдьиэнэ, икки тэттик кинигэ ааптара. Литератураны, поэзияны олус сөбүлүүр. Оҕолоругар, сиэннэригэр, эдэр ыччакка анаан уустаан-ураннаан хоһоон суруйар. Ол курдук «Олоҕу таптаа» диэн хоһоонун бэрт сэргии ааҕан, бу кыра суруйуубун кини строкаларынан түмүктүүбүн:
«Үчүгэй үлэһит
үрдүккэ талаһар.
Хаарбах хаһаайын
халлааны хастыыр.
Хобуоччу буолума,
хобу-сиби таһыма.
Толоостук тыллаһан
кэпсээҥҥэ кииримэ!».
Анивера АКИМОВА.