«Күндүттэн күндү кылаат — билии» диэн нэдиэлэҕэ Егор Кычкин аатынан Матта орто оскуолатыгар саха норуодунай суруйааччыта Бүөтүр Тобуруокап 100 сылыгар анаммыт тэрээһиннэр буоллулар.
edersaas.ru
Нэдиэлэ устата араас үөрэтэр, иитэр сыаллаах тэрээһиннэр буоллулар.
– «Кэскил» хаһыакка сурутууну көҕүлүүр тэрээһин «Кэскиллиин» – бииргэ!» кылаас чааһыттан саҕаланна. Бу аахсыйаҕа оҕолор олус тэрээһиннээхтик кыттыыны ыллылар. Ол кэнниттэн «Тобуруокабы төһө билэ5ин?» диэн онлайн-викторинаҕа суруйааччы ырыа буолбут хоһооннорунан бибилэтиэкэ уруоктара буолла.
Биир сонун сүүрээн – хоһооннор түһүмэхтэринэн улахан кылаастар киинэ устан көрдөрбүттэрэ буолар. Бу – саха киинэтэ оскуола паартатыттан саҕаланан сайдыытын туоһута. Аны «Junior skills» чемпионат биир көрүҥүн – мультимедийнай суруналыыстыка хайысхатын баһылааһын арылхайдык арылынна. Ол курдук, хаһыат «Сынньалаҥҥа» балаһатын Бүөтүр Тобуруокап олоҕор уонна айымньыларыгар олоҕуран онорууга 5-тэн 7-с кылааска тиийэ күрэхтэстилэр. Онно 5 кылаас үөрэнээччилэрэ Лера Находкина уонна Алика Кычкина бастыҥнарынан ааттаннылар, анал мэтээллэринэн наҕараадаланнылар.
– Бу үлэ олус биһирэнэн, «Мэлдьи бииргэ!» оскуолатааҕы хаһыакка бастайааннай тахсара мэктилэннэ, — диэн кэпсиир учуутал Анжелика Ченянова.
Аныгы үйэ диэх курдук, Бүөтүр Тобуруокап үбүлүөйдээх тэрээһинигэр оҕолор киинэ көрдөрөн соһуттулар, мультимедийнай суруналыыстыка көрүҥүн баһылаан үөртүлэр. Бу тэрээһиҥҥэ Матта оскуолатын оҕолоро билии, кырдьык да, күндү кылаат буоларын бигэргэттилэр.
Елена ПОТОЦКАЯ, «Саха сирэ» хаһыат, edersaas.ru
Хваартыскаҕа Анжелика Ченянова түһэриитэ.