Үүнэр көлүөнэ тыйаатырын дириэктэрэ Матрена Павловаҕа «РФ култууратын үтүөлээх үлэһитэ» бочуоттаах аат иҥэрилиннэ.
edersaas.ru
Арассыыйа бэрэсидьиэнэ Владимир Путин Үүнэр көлүөнэ тыйаатырын дириэктэригэр Матрена Павловаҕа «РФ култууратын үтүөлэх үлэһитэ» бочуоттаах ааты иҥэрэр туһунан б.дь. сэтинньи 23 күнүнээҕи 723 №-дээх ыйааҕар илии баттаата. Бу дьоһуннаах наҕарааданан Матрена Степановнаны СӨ Культуураҕа уонна духуобунай сайдыыга миниистирэ Юрий Куприянов эҕэрдэлээтэ. «Тыйаатыр ситиһиитэ салайааччытыттан улахан тутулуктаах. Ханнык баҕарар дьыалаҕа эн ис сүрэххиттэн ылсар буолаҥҥын, бары барыта эйиэхэ табыллар», — диэн туран, миниистир тыйаатыр салайааччыта бэйэтин идэтигэр ураты бэриниилээҕин бэлиэтээтэ.
Үүнэр көлүөнэ тыйаатырын дириэктэрэ, РФ култууратын үтүөлээх үлэһитэ, СӨ култууратын үтүөлээх үлэһитэ, СӨ култууратын туйгуна, СӨ ыччакка бэлиитикэтин туйгуна, Чурапчы улууһун Хайахсыт нэһилиэгин Бочуоттаах олохтооҕо Матрена Павлова бу сүҥкэн суолталаах наҕараадатын туһунан санаатын маннык үллэстэр:
— Бастакынан, бу наҕараада — Сахабыт сирин култууратын үлэтин таһымын үрдүктүк сыаналааһын. Иккиһинэн, Үүнэр көлүөнэ тыйаатырын 28 сыллаах үлэтин түмүгэ. Үсүһүнэн, оҕоҕо уонна ыччакка аналлаах тыйаатырдар аныгы сайдыылаах кэмҥэ улахан суолталаахтарын бэлиэтээһин.
Матрена Степановна ситиһиилээх үлэтин сыанабылынан — дойду үрдүкү наҕааадатынан истиҥник эҕэрдэлиибит!
Елена ПОТОЦКАЯ, «Саха сирэ» хаһыат», edersaas.ru