Уопсастыба Успуорт

Матрена Ноговицына сүүс харахтаах дуобакка аан дойду чөмпүйэнээтигэр өссө биир кыайыыта

Норуоттар икки ардыларынааҕы кылаастаах гроссмейстер Матрена Ноговицына аан дойду чөмпүйэнээтигэр уочараттаах кыайыытын ситистэ. Бу сырыыга Чурапчы дуобатчыта Италия Бергамо куоратыгар ыытылла турар күрэхтэһиигэ түргэн оонньууга тэҥнээҕин булбата.

Матрена норуоттар икки ардыларынааҕы кылаастаах гроссмейстердары Наталья Садовсканы (Польша), Виктория Мотричкону (Украина), спорт маастардарын Жанна Дмитренконы (Украина), Пирет Вирмыны (Эстония) хотто, биэс партияны тэҥнэһиинэн түмүктээтэ.

Украина дуобатчыта Виктория Мотричко иккис, классическай оонньууга аан дойду чөмпүйүөнэ Зоя Голубева (Латвия) үһүс буоллулар.

Аан дойду чулуулара ыам ыйын 31 – бэс ыйын 1 күннэригэр блиц оонньууга күрэстэһиэхтэрэ.

Санатар буоллахха, сүүс харахтаах дуобакка аан дойду чөмпүйэнээтигэр тоҕус дойдуттан 33 спортсмен кыттар. Кинилэр ортолоругар уон норуоттар икки ардыларынааҕы кылаастаах гроссмейстер, биэс норуоттар икки ардыларынааҕы кылаастаах спорт маастара уонна тоҕус спорт маастара бааллар.

Роман ПОПОВ, «Саха сирэ» хаһыат, edersaas.ru

Хаартыска: интэриниэттэн

0
0

Добавить комментарий