Матаннанов, Федоров, Старостин, Тойтонов, Друзьянов «Дыгын оонньууларыгар» кыттыахтара

Муус устар 29-30 күннэригэр “Дохсун” футбол манеһыгар “Дыгын оонньууларыгар” сүүмэрдиир бастакы түһүмэххэ отут алта эр бэрдэ биэс путевка иһин күрэс былдьаста.

edersaas.ru

Бэҕэһээ уолаттар «үс төгүл үскэ», «тутум эргииргэ» уонна мас тардыһыытыгар куоталаспыттара. Онно икки бастакы көрүҥҥэ Петр Старостин (Чурапчы) бастыҥ көрдөрүүлэммитэ. Мадьынылар күрэстэригэр Владимир Никитин (Амма) тэҥнээҕин булбатаҕа.

Бүгүн эр бэртэрэ оҕунан ытыыга, 400 м сүүрүүгэ, хапсаҕайга уонна тааһы көтөҕүүгэ күүстэрин холостулар.

Оҕунан ытыыга Альберт Николаев (Нам) бастакы миэстэни ылла. Сүүрүүгэ Петр Старостин иннигэр кими да түһэрбэтэ. Хапсаҕай түһүлгэтигэр Давид Колесовка (Мэҥэ Хаҥалас) тэҥнээх бөҕөс көстүбэтэ. Тааһы көтөҕүүгэ Николай Матаннанов (Таатта, «Боотур» кулууп) эрэллээхтик бастаата.

Онон икки күннээх күрэс кыайыылааҕынан Николай Матаннанов буолла. Дэгиттэр спортсмен «үс төгүл үскэ» — үһүс, «тутум эргииргэ» — сэттис, мас тардыһыытыгар — үһүс, оҕунан ытыыга — уон иккис, сүүрүүгэ — төрдүс. хапсаҕайга — уон алтыс уонна тааһы көтөҕүүгэ — бастакы миэстэлэри ылаттаата.

Владимир Федоров (Ньурба), Петр Старостин иккис, үһүс буоллулар. Бириистээх миэстэлэргэ тахсыбыттары сэргэ төрдүс, бэһис көрдөрүүлэммит Антон Тойтонов (Нам) уонна Павел Друзьянов (Чурапчы, «Боотур» кулууп) «Дыгын оонньууларын» түмүк түһүмэҕэр кыттар быраабы ыллылар.

Санатан эттэххэ, былырыыҥҥы күрэскэ үс бастакы миэстэни ылбыт Егор Филиппов, Артем Варданян итиэннэ Алексей Козлов быйылгы “Дыгын оонньууларгыр” сүүмэрдээһинэ суох, быһа кыттар бырааптаахтар.

Хаалбыт түөрт путевка иһин ыам ыйын эргэтигэр “Орто дойду” этнокомплекска сытыы киирсиилэр буолаллара күүтүллэр.

Роман Попов, «Саха сирэ» хаһыат, edersaas.ru