Уруулга арыгы иһэн баран олорбут суоппардар 2015 сыл от ыйын 1 күнүгэр диэри административнай эрэ эппиэккэ тардыллар этилэр. Ол эрэн, ити күнтэн саҕалаан, РФ Холуобунай кодексатыгар 264.1-с ыстатыйа эбиллибитэ.
Бу ыстатыйаҕа олоҕуран, урукку өттүгэр уруулга итирик олорон административнай эпиэккэ тардылла сылдьыбыт киһи хаттаан оннук туруктаах түбэстэҕинэ, холуобунай эппиэтинэскэ тардыллар.
СӨ Борокуратууратын пресс-сулууспата иһитиннэрбитинэн, Нерюнгри куоракка урут сууттана сылдьыбыт киһиэхэ суут бириигэбэрэ тахсыбыт. Суут кинини РФ Холуобунай кодексатын 264.1-с ыстатыйатынан буруйдааҕынан билиммит.
Суут быһаарбытынан, 2018 сыл сэтинньитигэр бу киһи ити иннинэ арыгы иһэн баран уруулга олорон, административнай эппиэккэ тардыллан, накаастаммыт болдьоҕо бүтэ илигинэ, эмиэ итирик ыыта сылдьан түбэспит.
Онон, бу киһи оҥорбутун син биир оҥоро турарын иһин, суут бу сырыыга кинини көҥүлүн быһарга уурбут — 1 сыл 4 ыйга кытаанах эрэсиимнээх холуонньаҕа.
Ону тэҥэ, 3 сылга массыына ыытар быраабын эмиэ быспыт.
Холуобунай кодекс 264.1-с ыстатыйатын накаастабыл миэрэлэрэ:
200 тыһ. солк. — 300 тыһ. солк. диэри суумалаах ыстараап, 480 чааска диэри булгуччулаах босхо үлэлээһин, 2 сылга диэри көҥүлү быһыы. Итини таһынан, эбиитин 3 сылга диэри болдьоххо массыына ыытар бырааба быһыллар.
Биһиги корр., «Саха сирэ» хаһыат, edersaas.ru
Хаартыска: интэриниэттэн.