Дьоҥҥо итэҕэйимтиэ киһи түөкүттэр сиэртибэлэрэ буолара дэбигис. Итинник түбэлтэлэр күннэтэ тахса тураллар.
Вера МАКАРОВА, «Саха сирэ» хаһыат, https://edersaas.ru/
Бу дьыл олунньу 1 күнүгэр Дьокуускай куорат полициятыгар биир киһи массыынатын уордаран, сайабылыанньа суруйбут.
Полицейскайдар быһаарбыттарынан, бу киһи «Тойота Аристо» массыынатын атыылыыр туһунан биллэрии биэрбит. Онуоха тута биир атыылаһааччы эрийэн, хотугу улууска олорорун, Дьокуускайга быраата баарын, кини тиийэн массыынаны көрүөҕүн туһунан кэпсэппиттэр.
Ол «быраата» кэлэн, массыына сыанатын уонна хайдах төлөһөрүн туһунан тылынан дуогабардаспыттар. Оттон ол «хоту олорор» киһи атыылааччыга төлөпүөннээн, харчыны ыыппытын, суукка иһинэн счетугар киириэҕин туһунан эппит. Уонна харчы тиийэ илигинэ, массыынаны Можайскай уулуссатыгар турар гарааска «туруоран эрэригэр» көрдөспүт.
Атыылааччы сарсыныгар гарааска тиийбитэ — массыыната да суох, счетугар да харчы мэлигир. Оттон «хотугу олохтоох» төлөпүөнэ арахсыбыт.
Бу чахчынан «Түөкүннээһин» ыстатыйанан холуобунай дьыала тэриллибитин Дьокуускай куорат полициятын пресс-сулууспата иһитиннэрдэ.
Полиция сэрэтэр: баайгытын-малгытын атыылыыргытыгар, болҕомтолоох, сэрэхтээх буоларгытыгар. Харчыны илиигитигэр тута иликкитинэ, табааргытын атыылаһааччыга биэримэҥ!
Вера МАКАРОВА, «Саха сирэ» хаһыат, https://edersaas.ru/
Хаартыска: интернеттэн.