Массыынаны ыытарга аналлаах дастабырыанньа болдьоҕо үс сылга тута уһатыллар буолла
Массыынаны ыытарга быраап болдьоҕор эмиэ уларыйыылар киирэр буоллулар. Холобур, 2022-2023 сылларга болдьохторо бүтэр быраабы тута үс сылга уһатыахтара. Чуолкайдыыр буоллахха, 2022 сыл тохсунньу 1 күнүттэн 2023 сыл ахсынньы 31 күнүгэр диэри болдьохторо бүтэр тустаах дастабырыанньалар уларыйыыга хабыллаллар. Бу иһитиннэриини РФ премьер-министрэ Михаил Мишустин толору бигэргэппитэ. «Биисинэһи уонна нэһилиэнньэни ноҕоруускалаабат инниттэн административнай мэһэйи кыччатарга аналлаах дьаһал таҕыста. Арассыыйа иһигэр массыынаны ыытарга аналлаах дастабырыанньаларын болдьоҕо бүтэр дьон киэнэ өссө үс сылга тута уһаан биэриэҕэ», — диэн Михаил Мишустин быһаарбыт.
«Улахан хампаанньаларга үлэлиир дьон саҥа дастабырыанньаны ылар инниттэн көмүскэ тэҥнээх бириэмэлэрин мэдиссиинискэй хамыыһыйаны ааһыыга барыахтара суоҕа. Үлэлээбиттэрин курдук үлэлииллэр, ол кэмҥэ болдьохторо бүппүт тустаах докумуоннара тута аһатыллан бэриллиэхтэрэ», — диэн РФ Экэниэмиэкэҕэ министиристибэтигэр кэмэнтээрийдээбиттэр.
Европейскайдааҕы юридическай сулууспа исписэлииһэ Дмитрий Безделин тустаах уларыйыы арҕаа дойдулар сааҥсыйаларын усулуобуйатыгар бастакы уочарат аччыгый биисинэһи өйүүргэ көдьүүстээх буоларын туһунан ыйбыт. Массыынаны ыытарга аналлаах быраап болдьоҕун уһуна уон сылга тэҥнэһэр. Ити кэм устатыгар суоппар доруобуйата мөлтүөн сөп диэн быһаарар. «Уон сылга биирдэ массыыналаах киһи мэдиссиинискэй бэрэбиэркэни ааһар. Бу кэмҥэ суоппар доруобуйата мөлтүөн сөп. Ол эрээри, суоппар доруобуйатын бэрэбиэркэлиир анал хамыыһыйалар үлэлэрин хаачыстыбата араас буолара эмиэ иһиллэр», — диэн Дмитрий Безделин санаатын үллэстибит.
Манна биири өйдүөххэ наада. Уон сыл кэнниттэн тустаах докумуон уларыйарыгар суоппар биирдэ доруобуйатын туругун көрдөрөр диэн этии сөбө суох курдук. Билигин үгүс киһи доруобуйатын туругун сыл аайы көрдөрөр, ол аныгы олох култууратын сиэринэн барыбытыгар киирдэ. Аны туран, киһини сааһынан көрөргө-истэргэ поликлиникаларга диспанзерация диэн баар. Холобур, 2022 сыллааҕы диспансеризацияҕа 1983, 1986, 1989, 1992, 1995, 1998, 2001, 2004 сыллаах төрүөхтэр уонна 40 саастарын ааспыт дьон бары хабыллаллар. Диспансеризацияҕа киһи доруобуйатын туругун үчүгэйдик көрөллөр-истэллэр. Ол аата билигин нэһилиэнньэ үгүс араҥата сыл аайы доруобуйатын туругун хайаан да көрдөрүнэр. Онон 10 сылга суоппар доруобуйата мөлтөөбүтэ биллибэккэ хаалыа диир сыыһа соҕус этии буолар.