Эрдэ суруйбуппут курдук, уруулга арыгы иһэн баран олорбут суоппардар 2015 сыл от ыйын 1 күнүгэр диэри административнай эрэ эппиэккэ тардыллар этилэр.
Ол эрэн, ити күнтэн саҕалаан, РФ Холуобунай кодексатыгар 264.1-с ыстатыйа эбиллибитэ. Бу ыстатыйаҕа олоҕуран, урукку өттүгэр уруулга итирик олорон административнай эпиэккэ тардылла сылдьыбыт киһи хаттаан оннук туруктаах түбэстэҕинэ, холуобунай эппиэтинэскэ тардыллар.
СӨ Борокуратууратын пресс-сулууспата иһитиннэрбитинэн, Ньурба улууһугар мировой суут 32 саастаах киһиэхэ бириигэбэр таһаарда.
Суут быһаарбытынан, бу киһи 2016 сыл от ыйыгар РФ Холуобунай кодексатын 264.1-с ыстатыйатынан сууттана сылдьыбыт эбит. Онно киниэхэ суут накаастабыл миэрэ быһыытынан, 200 чааска булгуччулаах үлэни анаабыт уонна 2 сыл массыына ыытар быраабын быспыт.
Оттон бу сыл балаҕан ыйыгар туох дьыаланан сууттаммытын хоҥоруутугар хоҥнорбокко, эмиэ соннук уруулга итирик олорон, ити сокуону хаттаан кэспит.
Суут кинини буруйдааҕынан билинэн, 10 ыйга көс-холуонньаҕа көҥүлүн быһарга уурбут. Уонна 3 сыл устатыгар уруулга олорор быраабын быспыт.
Бириигэбэр сокуоннай күүһүгэр киирэ илик. Өрүттэр ааһыныахтарын сөп.
Холуобунай кодекс 264.1-с ыстатыйатын накаастабыл миэрэлэрэ:
200 тыһ. солк. — 300 тыһ. солк. диэри суумалаах ыстараап, 480 чааска диэри булгуччулаах босхо үлэлээһин, 2 сылга диэри көҥүлү быһыы. Итини таһынан, эбиитин 3 сылга диэри болдьоххо массыына ыытар бырааба быһыллар.
Биһиги корр., «Саха сирэ» хаһыат, edersaas.ru
Хаартыска: интэриниэттэн.