Букатын өйдөммөт дьон баар буолар, оҥорбуттарын син биир оҥоро турар. Биир оннук киһиэхэ суут бириигэбэрэ тахсыбытын туһунан СӨ Борокуратууратын пресс-сулууспата иһитиннэрдэ.
Ол курдук, Мииринэй федеральнай суута быһаарбытынан, бу киһи быйыл саас, олунньу ыйга, арыгы иһэн баран, массыына ыыта сылдьан, ГИБДД иниспиэктэрдэригэр тутуллубут.
Онно биллибитинэн, бу иннинэ эмиэ уруулга итирик олорон, номнуо иккитэ сууттана сылдьыбыт эбит.
Мировой суут киниэхэ 10 ый усулуобунай миэрэни анаабыт.
Судаарыстыбаннай буруйдааччы (борокуруор) сымнаҕас бириигэбэр диэн бу уураахха сөпсөспөккө, апелляцияҕа ааһыммыт.
Ол түмүгэр, буруйдаахха накаастабыл миэрэ уларыйан, 1 сыл көс-холуонньаҕа көҥүлэ быһыллыбыт, ону таһынан, 3 сылга көлөнү ыытар бырааба быһыллыбыт.
Санатар буоллахха, уруулга арыгы иһэн баран олорбут суоппардар 2015 сыл от ыйын 1 күнүгэр диэри административнай эрэ эппиэккэ тардыллар этилэр. Онтон ити күнтэн саҕалаан, РФ Холуобунай кодексатыгар 264.1-с ыстатыйа эбиллибитэ. Бу ыстатыйаҕа олоҕуран, урукку өттүгэр уруулга итирик олорон административнай эппиэккэ тардылла сылдьыбыт киһи хаттаан оннук туруктаах түбэстэҕинэ, холуобунай эппиэтинэскэ тардыллар.
Холуобунай кодекс 264.1-с ыстатыйатын накаастабыл миэрэлэрэ:
200 тыһ. солк. — 300 тыһ. солк. диэри суумалаах ыстараап, 480 чааска диэри булгуччулаах босхо үлэлээһин, 2 сылга диэри көҥүлү быһыы. Итини таһынан, эбиитин 3 сылга диэри болдьоххо массыына ыытар бырааба быһыллар.
Биһиги корр., «Саха сирэ» хаһыат, edersaas.ru
Хаартыска: интэриниэттэн