Истэригэр кэтит быаны эринэн баран бүтүн иномарканы, УАЗ-игы йогтар эрэ соһон тилигирэтэллэрэ буолуо дии санаабытым, Ньурба Күндээдэтигэр иннинэн сирэйдээҕи, иэгэйэр икки атахтааҕы сөхтөрөр, илиилэригэр күрүлүүр күүстээх дьон бааллар эбит. Өскөтүн нуучча дьахталлара сүүрэн иһэр аты тохтотор, умайа турар дьиэҕэ киирэр буоллахтарына, саха кэрэ куолара биирдии бэйэлэрэ туораттан көмөтө суох бүтүн иномарканы бэрт чэпчэкитик быанан 30-50 м. тиийэ соһоллор. Туох да бэлэмэ суох боростуой тыа дьоно.
edersaas.ru
Күндээдэҕэ куорат курдук аралдьыйыы суох буолан, олохтоохтор бэйэлэрэ күрэхтэһии арааһын толкуйдууллар, массыыналарын тааҥка курдук киэргэтэн тоҥуу хаар быыһынан ойуталлар, сырсыһа оонньууллар, сыал ыталлар, сымсаларын-сылбаларын тургутар күрэҕи ааһаллар.
Ньурба Чаппандатыттан төрүттээх Иван Иванов олохтоох дьаһалтаҕа ыччат бэлиитикэтин исписэлииһинэн үлэлиир. ЯГИТИ-ни бүтэрэн инженер-тутааччы идэлээх. Оттон кэргэнэ «Земскэй доктор» бырагырааманан кэлэн, учаастактааҕы быраас буолан нэһилиэк дьонун барытын көрөр-истэр. Эдэр ыал Күндээдэҕэ олохсуйбуттара биир сыл буолла.
Бу нэһилиэккэ хайа да тэрилтэҕэ киир — бары эдэрдэр. Киһи саамай үөрэрэ, Сахабыт сирин араас муннуктарыттан үрдүк үөрэхтээх исписэлиистэр олохсуйа кэлэллэр. Урукку курдук үөрэххэ сатаан киирбэтэх ыччат тыа сиригэр хаалар диэн өйдөбүл эргэрбит.
Куораттан кэлбит эдэр дьон оһох оттортон, иһэр ууга муус бэлэмнииртэн, сайын ону булууска харайартан, туох да хааччыллыыта суох чааһынай дьиэҕэ олорортон саллыбаттар.
Эдэрдэри тыа сиригэр олохсутарга 35 диэри саастаах ыалга ТХМ хайысхатынан дьиэ туттарга тутуу матырыйаалын барытын атыылаһан биэрэллэр.
Марианна Тыртыкова, «Саха сирэ», edersaas.ru