Массыынанан айаннааччыларга туһалаах сыһыарыыны оҥордулар

Ааптар: 
Бөлөххө киир:

Дьокуускай-Өлүөхүмэ-Дьокуускай хайысхатынан массыынанан айаннааччыларга аналлаах бэрт табыгастаах “Километры” диэн төлөпүөн сыһыарыыта үлэлээтэ. 

edersaas.ru

Сыһыарыыны Арктикатааҕы искусство уонна култуура судаарыстыбаннай университетыгар бииргэ үөрэммит доҕордуулар Антон Васильев уонна Ньургун Банчин оҥордулар. Манна даҕатан эттэххэ, Антон программированиенан устудьуон сыллартан дьарыктанар. Үөрэҕин бүтэрээт Дьокуускайга, Москваҕа үлэлээбит. Дойду тэбэр сүрэҕэр интэриниэт маҕаһыыннары куйаар ситимигэр үлэлэрин хааччыйбыт, аан дойду чөмпүйүөнэ, бойобуой искусстволар маастардара Хабиб Нурмагомедовы кытта тэйиччиттэн дьарыктанар OсtaZone сыһыарыыны оҥорууну сүрүннээбит (старший разработчик). Саха сиригэр “Водопад” бырагырааматын айбыт программиһынан биллэр. Дьокуускайга хас даҕаны хампаанньа туттар. Ону таһынан, Антон бэйэтэ оҥорбут бырагыраамалара үгүс.
Билигин интэриниэт Саха сирин хайа баҕарар улууһугар үчүгэй. Онон уолаттар биирдэрэ Тааттаҕа, биирдэрэ Өлүөхүмэҕэ олордоллор да, урбаанньыт быһыытынан сүбэлэрин холбоон бииргэ айар-тутар бырайыактара элбэх. Ол курдук, быйыл сайын Өлүөхүмэ улууһугар ыытыллыбыт Олоҥхо ыһыаҕар анаан “Ысыах Олонхо-2021” сыһыарыыны оҥорбуттара. Бу сырыыга “Километры” диэн массыынанан айаннааччыларга аналлааҕы айдылар.

“Эдэр саас” саайт үлэһиттэрэ Антон Васильевы кытта сибээстэһэ сырыттыбыт:
— “Километры” сыһыарыы доҕорум Ньургун Банчин толкуйа. Маҥнай Өлүөхүмэ-Дьокуускай-Өлүөхүмэ хайысханан уунан дьону таһар таксистарга уонна айанньыттарга көмөлөөх буоларын туһугар информационнай сайт уонна сыһыарыы оҥорбуппут. Салгыы массыынанан дьону таһар таксистарга толкуйдуохха диэн этии киллэрбитэ. Санаатын үллэстибитин кэннэ сүбэбитин холбоон, оҥоруутугар ылсан барбыппыт.
Манна рейстэр испииһэктэрэ бааллар. Холобура, ахсынньы 20 күнүгэр Өлүөхүмэттэн Дьокуускайга диэри ханнык таксистар бараллара, нүөмэрдэрэ ыйыллар. “Ким Дьокуускайдыырый?” диэн дьонтон туоһулаһа барбакка, сыһыарыы нөҥүө барытын билэ-көрө олороллор. Аны атын улуус киһитэ барарыгар таксистар нүөмэрдэрин булара күчүмэҕэйдэрдээх, дьонтон ыйыталаһыан наада. Оттон сыһыарыыга барыта ыйылла сылдьар. Төлөпүөҥҥэ аҕыйах кнопканы баттаат, таксиһы кытта кэпсэтэн номнуо болдьоһор.


Сыһыарыы саҥа тарҕанан эрэр, буор босхо. Play Market-тан уонна AppStore-тан хачайдыаххытын сөп, Android уонна iOS төлөпүөннэргэ аналлаах.  https://kilometry.app  ыйыллыбыт сигэнэн көрүөххүтүн сөп.  Интэриниэт мөлтөх даҕаны сиригэр үлэлиир. Күн бүгүн 2000 кэриҥэ киһи хачайдаата, — диэн кылгастык кэпсээтэ.
Айанныыр, кэлэр-барар дьоҥҥо аналлаах биллэриилэри, бассаап бөлөхтөрү аахсыбатахха, “Километры” курдук сыһыарыы күн бүгүн Саха сиригэр ханыыта суох. Дьокуускайы сэргэ Өлүөхүмэ-Ленскэй-Өлүөхүмэ хайысхатынан эмиэ баар. Эдэр программистар бу сыһыарыыны судургу, дьоҥҥо дэбигис өйдөнүмтүө диэн быһаараллар. Инникитин өссө сайыннаран, тупсаран, өрөспүүбүлүкэҕэ барытыгар тарҕатар былааннаахтар.

Людмила ПОПОВА, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0