Бэрээдэк Уопсастыба

Массыына тимириитин төрүөтэ — быраабыланы кэһии

Олунньу 16 күнүгэр Дьааҥы улууһугар Оһохтоох сэлиэнньэтиттэн 1 көстөөх сиргэ “МАЗ” таһаҕас тиэйэр массыына муус анныгар барбыта. Кабинаҕа икки киһи баарыттан, суоппар нэһиилэ тахсан, бөһүөлэккэ тиийбит. ЫБММ пресс-сулууспата иһитиннэрбитинэн, бу быһылаан төрүөтүнэн таһаҕаһы тиэйии быраабылатын кэһии буолбут.

Массыына чох тиэйэн испит, таһаҕаһын ыйааһына 20-чэ туонна, массыына ыйааһынын кытары барыта 50-тан тахса туонна эбит. Муус аннынан уу 6,5 миэтэрэ дириҥнээх, муус халыҥа – 81 см. Маннык учаастакка 30 туоннаттан ыарахан таһаҕаһы тиэйэр бобуллар.

«Вести Верхоянья» хаһыат суруйарынан, тимирбит массыына муус аннынан 6 миэтэрэ дириҥҥэ сытар диэн улуус баһылыгын солбуйааччы Гаврил Ефимов этэр. Олорсон испит киһи өлүгэ ханна баара билиҥҥитэ биллибэт. Сабаҕаланарынан, кабина иһигэр баар буолуохтаах.

Улуус дьаһалтата Быыһыыр сулууспаҕа сайаапка биэрэн, олунньу 18 күнүгэр водолазтар миэстэтигэр тиийэн, үлэлиэхтэрэ.

Ангелина Васильева, “Саха сирэ” хаһыат, edersaas.ru

Хаартыска: ykt.ru

0
0
Telegram Whatsapp